Ruturaj Gaikwad’s reaction after becoming captain: बीसीसीआयने १४ जुलै रोजी आशियाई क्रीडा २०२३ मधील स्पर्धेसाठी पुरुष आणि महिला क्रिकेट संघांची घोषणा केली आहे. आशियाई क्रीडा स्पर्धेत १५ सदस्यीय भारतीय पुरुष संघाचे नेतृत्व युवा खेळाडू ऋतुराज गायकवाड करणार आहे. बीसीसीआयच्या या निर्णयाने सर्वांनाच आश्चर्याचा धक्का बसला असला, तरी भविष्याच्या दृष्टीने हा निर्णय घेण्यात आला आहे. कर्णधारपदाची जबाबदारी मिळाल्यानंतर ऋतुराजने आपली प्रतिक्रिया दिली आहे.
बीसीसीआयने जारी केलेल्या व्हिडिओमध्ये ऋतुराज गायकवाड सांगितले की, देशासाठी सुवर्णपदक जिंकून राष्ट्रगीत गाण्यासाठी व्यासपीठावर उभे राहण्याचे त्याचे स्वप्न आहे. ५ ऑक्टोबरपासून भारतात एकदिवसीय विश्वचषक सुरू होणार असल्यामुळे बीसीसीआयने आशियाई क्रीडा स्पर्धेसाठी संपूर्ण युवा संघ पाठवण्याचा निर्णय घेतला आहे.
कर्णधार झाल्यानंतर ऋतुराज गायकवाड म्हणाला की, ‘मी बीसीसीआय, संघ व्यवस्थापन आणि निवडकर्त्यांचे आभार मानू इच्छितो ज्यांनी माझ्यावर ही जबाबदारी सोपवली. भारतासाठी खेळणे ही नेहमीच अभिमानाची गोष्ट आहे आणि या मोठ्या स्पर्धेत संघाचे नेतृत्व करणे ही माझ्यासाठी मोठी गोष्ट आहे. या संघातील आपल्या सर्व युवा खेळाडूंना स्वत:ला सिद्ध करण्याची चांगली संधी असेल.’
रिंकू सिंगलाही मिळाले संघात स्थान –
वेस्ट इंडिजविरुद्धच्या टी-२० मालिकेत निवड न झाल्यानंतर आता आशियाई क्रीडा स्पर्धेसाठी जाहीर करण्यात आलेल्या भारतीय संघात रिंकू सिंगचा समावेश करण्यात आला आहे. याशिवाय अशा अनेक नावांचाही या संघात समावेश आहे, जे गेल्या काही आयपीएल हंगामात सातत्यपूर्ण कामगिरी करत आहेत. अर्शदीप सिंग व्यतिरिक्त संघात वेगवान गोलंदाजीमध्ये आवेश खान, मुकेश कुमार आणि शिवम मावी आहेत.
हेही वाचा – IND vs WI 1st Test: इशान किशनने सामन्यादरम्यान अजिंक्य रहाणेची उडवली खिल्ली, VIDEO होतोय व्हायरल
आशियाई क्रीडा स्पर्धेसाठी भारतीय संघ:
ऋतुराज गायकवाड (कर्णधार), यशस्वी जैस्वाल, राहुल त्रिपाठी, तिलक वर्मा, रिंकू सिंग, जितेश शर्मा (यष्टीरक्षक), वॉशिंग्टन सुंदर, शाहबाज अहमद, रवी बिश्नोई, आवेश खान, अर्शदीप सिंग, मुकेश कुमार, शिवम मावी, शिवम दुबे, प्रभसिमरन सिंग (यष्टीरक्षक).
राखीव खेळाडू: यश ठाकूर, साई किशोर, व्यंकटेश अय्यर, दीपक हुडा, साई सुदर्शन.
