चित्रकार प्रफुल्ल सावंत यांना आकाश ठेंगणे!

चहा बनविण्यातही सचिन पारंगत – हिरवाणी
नागपूर : फलंदाजीत अनेक विक्रमांची शिखरे ओलांडणारा सचिन तेंडुलकर हा चहा बनविण्यातही पारंगत आहे, असा खुलासा भारताचे माजी फिरकी गोलंदाज नरेंद्र हिरवाणी यांनी सांगितले. सचिनबरोबर अनेक दौऱ्यांमध्ये भाग घेण्याची संधी मला मिळाली असे सांगून हिरवानी म्हणाले, ‘‘गेली २४ वर्षे आमच्यात मैत्रीचे चांगले नाते आहे. न्यूझीलंड दौऱ्यात आम्हा दोघांना एकत्र खेळण्याची संधी मिळाली. त्या वेळी सचिनचा खेळ व स्वभाव अगदी जवळून पाहिला आहे. या दौऱ्यात आम्ही एकाच खोलीत राहात होतो. त्या वेळी माझ्यासाठी तो चहा तयार करून ठेवीत असे व त्यानंतर मला उठवत असे. त्याने या दौऱ्यातील ७२ दिवसांपैकी ६२ दिवस माझ्यासाठी चहा बनवला होता. सचिन हा मुलखावेगळा खेळाडू आहे. चालता-बोलता तो क्रिकेटच जगत असतो. न्यूझीलंड दौऱ्यात मोकळ्या वेळी तो स्वत:ची बॅट स्वच्छ करीत असे किंवा एकटाच बॅटीने चेंडू मारण्याचा सराव करीत असे.’’

रोहतक लढतीसाठी सचिनच्या निवासाचा प्रश्न
नवी दिल्ली : कारकिर्दीतील अखेरच्या २००व्या सामन्यासाठी सराव म्हणून सचिन तेंडुलकर मुंबईकडून हरयाणाविरुद्धच्या रणजी सामन्यत खेळणार आहे. हा सामना लाहिली, रोहतक या छोटय़ाशा गावी होणार असल्यामुळे महान फलंदाज आणि राज्यसभेचा खासदार असलेल्या सचिनच्या निवासाचा प्रश्न ऐरणीवर आला आहे. रोहतकमध्ये द्वितीय, तृतीय, पंचतारांकित दर्जाचे हॉटेल नाही. हॉटेलमध्ये पंधरापेक्षा अधिक खोल्या नाहीत. काही रिसॉर्ट्स आहेत मात्र त्यातही पुरेश्या खोल्या नाहीत. सचिन खासदार असल्याने त्याच्या सुरक्षेची काळजी घेणेही तितकेच आवश्यक आहे. सचिनसह संपूर्ण संघ आणि अन्य कर्मचारी एकत्र राहतील असे हॉटेल नसल्याने आयोजकांपुढे समस्या निर्माण झाली आहे. अपवादात्मक परिस्थितीत हरयाणाचे मुख्यमंत्री भूपिंदर सिंग हुडा यांच्या निवासस्थानी सचिनची राहण्याची व्यवस्था होऊ शकते.