Sachin Tendulkar's Reply to Akhtar about IND vs PAK Match: एकदिवसीय विश्वचषक २०२३ मधील १२व्या सामन्यात पाकिस्तानला भारताविरुद्ध दारुण पराभव पत्करला आहे. या पराभवानंतर सोशल मीडियावर पाकिस्तान संघाची खूप खिल्ली उडवली जात आहे. जिथे भारताचा माजी गोलंदाज इरफान पठाण आणि माजी क्रिकेटर वीरेंद्र सेहवागने पाकिस्तानच्या पराभवाचा आनंद लुटला. आता मास्टर ब्लास्टर सचिन तेंडुलकरनेही शोएब अख्तरच्या एका पोस्टला उत्तर देत पाकिस्तानच्या माजी वेगवान गोलंदाजाला चोख प्रत्युत्तर दिले आहे. काय होतं संपूर्ण प्रकरण? वास्तविक, शोएब अख्तरने १३ ऑक्टोबर रोजी एक्सवर (ट्वीटर) एक पोस्ट केली होती. यामध्ये त्याने सचिन तेंडुलकरला बाद करतानाचा जुना फोटो शेअर केला होता. या फोटोच्या कॅप्शनमध्ये त्यांनी लिहिले होते की, उद्या तुम्हाला असे काही करायचे असेल तर शांत राहा. आता त्याच पोस्टला उत्तर देताना सचिन तेंडुलकरने पाकिस्तानच्या माजी क्रिकेटपटूला चोख प्रत्युत्तर दिले आहे. सचिनच्या उत्तराचा फोटो चांगलाच व्हायरल होत आहे. सचिनने काय दिले प्रत्युत्तर? सचिन तेंडुलकरने शोएब अख्तरच्या पोस्टला उत्तर देताना लिहिले की, 'माझ्या मित्रा तुझ्या सल्ल्याचे पालन केले आणि सर्वकाही पूर्णपणे थंड ठेवले.' सचिनच्या या उत्तरामुळे सोशल मीडियावर जोरदार चर्चा होत आहे. पहिल्या डावात पाकिस्तानने ६ विकेट्स गमावल्यानंतर शोएब अख्तरने यापूर्वी निराशा व्यक्त केली होती. पाकिस्तानच्या फलंदाजावर प्रतिक्रिया देताना त्याने आपली निराशा व्यक्त केली. भारताचा पाकिस्तानवर दणदणीत विजय - सामन्याबद्दल बोलायचे, तर अहमदाबादच्या नरेंद्र मोदी स्टेडियमवर भारताचा कर्णधार रोहित शर्माने नाणेफेक जिंकून गोलंदाजी करण्याचा निर्णय घेतला. पाकिस्तानचा संघ ४२.५ षटकांत १९१ धावांवर गारद झाला. प्रत्युत्तरात भारताने ३०.३ षटकांत ३ गडी गमावत १९२ धावा करून सामना जिंकला. टीम इंडियाने विश्वचषकाच्या इतिहासात पाकिस्तानविरुद्धची विजयी मालिका सुरू ठेवली आहे. भारताचा हा आठवा विजय आहे. कर्णधार रोहित शर्माने ८६ धावांची शानदार खेळी केली. त्याचवेळी जसप्रीत बुमराहने सात षटकात १९ धावा देत दोन बळी घेतले. त्याला सामनावीर म्हणून निवडण्यात आले.
