सानिया-कॅरा उपांत्य फेरीत

सानिया मिर्झाने आपली झिम्बाब्वेची साथीदार कॅरा ब्लॅकच्या साथीने खेळताना पोर्तुगाल खुल्या टेनिस स्पर्धेच्या उपांत्य फेरीत आगेकूच केली. मात्र सोमदेव देववर्मनला दुसऱ्याच फेरीत पराभवाला सामोरे जावे लागले. अव्वल मानांकित सानिया-कॅरा जोडीने सिल्व्हिआ सोलर इसपिनोसा-शुआई झांग जोडीवर ६-३, ६-४ असा विजय मिळवला. पुढच्या फेरीत या जोडीची लढत अमेरिकेच्या लिझेल ह्य़ुबेर आणि लिसा रेमंड जोडीशी होणार आहे. पुरुषांमध्ये अव्वल मानांकित चेक प्रजासत्ताकच्या टॉमस बर्डीचने सोमदेववर ६-३, ६-२ अशी मात केली.