भारतीय क्रिकेट संघातील वेगवान गोलंदाज जसप्रीत बुमराह अहमदाबादमध्ये झालेल्या इंग्लंड विरुद्धच्या चौथ्या व अखेरची कसोटी खेळला नाही. २८ वर्षीय बुमराह लवकरच लग्नाच्या बंधनात अडकणार असल्याचंही सुत्रांनी सांगितलं आहे. विशेष म्हणजे बुमराह स्पोर्ट्स सुत्रसंचालक संजना गणेशननशी लग्न करणार आहे. या संदर्भात दोघांनीही अद्याप मौन बाळगलं आहे. मात्र, अभिनेत्री तारा शर्मा सलुजाने सोशल मीडियावर पोस्ट करत या बातमीवर शिक्कामोर्तब केलंय.
तारा शर्मा सलुजाने तिच्या इन्स्टाग्राम अकाऊंटवरून एक फोटो शेअर केला आहे. या फोटोत जसप्रीत, तारा आणि तिचे मुलं दिसत आहेत. या फोटोच्या कॅप्शनने सगळ्यांचे लक्ष वेधले आहे. ताराने दिलेल्या कॅप्शनमुळे जसप्रीत आणि संजनाच्या लग्नाच्या बातमीवर शिक्कामोर्तब केला आहे. “जसप्रीत आणि संजना तुम्हाला तुमच्या लग्नासाठी खूप खूप शुभेच्छा. ताराशर्मा शोमधल्या तुझ्या उत्स्फूर्त सहभागाबद्दल धन्यवाद, आणि तुम्हाला दोघांना एकत्र ६व्या पर्वात पाहण्यासाठी उत्सुक आहोत. तुझ्या संपुर्ण कुटूंबाला खूप खूप शुभेच्छा.” अशा आशयाचे कॅप्शन तिने या फोटोला दिले आहे.
जसप्रीत आणि संजना १४-१५ मार्चला गोव्यात लग्न करणार असल्याची चर्चा आहे. करोनाच्या संकटामुळे मोजक्या आणि जवळच्या लोकांना या लग्नासाठी बोलवण्यात येणार आहे.
