IND vs ENG 1st T20I Highlights in Marathi: अभिषेक शर्माच्या वादळी फलंदाजीच्या जोरावर इंग्लंडविरूद्ध भारताने ७ विकेट्सने दणदणीत विजय मिळवला. भारताच्या गोलंदाजांनी इंग्लंड संघाच्या धावांवर असा काही अंकुश ठेवला की त्यांना पुनरागमानाची संधीच दिली नाही. अर्शदीप सिंग आणि वरूण चक्रवर्तीच्या भेदक गोलंदाजीच्या जोरावर भारताने इंग्लंडला १३२ धावांत सर्वबाद केले. १३३ धावांच्या लक्ष्याचा पाठलाग करताना संजू सॅमसनने भारताला वेगवान सुरूवात करून दिली. दुसऱ्याच षटकात त्याने २२ धावा करत इंग्लंडच्या सर्वाेत्कृष्ट गोलंदाजाची धुलाई केली.
संजू सॅमसनने इंग्लंडमध्ये कसोटीत आपल्या गोलंदाजीने सर्वांना प्रभावित करत हॅटट्रिक घेणाऱ्या गस अॅटकिन्सनची चौकार-षटकारांसह धुलाई केली. संजूने ४ चौकार आणि एका षटकारासह त्याच्या गोलंदाजीची पार भिंगरीच उडवली. यानंतर इंग्लंडने त्याच्या जागी पुढील षटक टाकण्यासाठी दुसऱ्या गोलंदाजाला पाचारण केले.
संजू सॅमसन आणि अभिषेक शर्मा यांनी भारतीय डावाची सुरुवात केली. पहिल्या षटकात संजूने सर्व चेंडू खेळून केवळ एक धाव केली. मात्र त्याच्या बॅटने दुसऱ्याच षटकात वादळी फलंदाजी केली. भारतीय डावातील दुसरे षटक टाकण्याची जबाबदारी गस ऍटकिन्सनवर देण्यात आली. पण इंग्लंडला हे षटक चांगलेच महागात पडले. ॲटकिन्सनच्या पहिल्या दोन चेंडूंवर संजूने चौकार मारले. तिसरा चेंडू डॉट बॉल होता. यानंतर सॅमसनने चौथ्या चेंडूवर दणदणीत षटकार ठोकला. सॅमसनने पाचव्या आणि सहाव्या चेंडूवर चौकार लगावत एकाच षटकात एकूण २२ धावा केल्या. अशारितीने संजू सॅमसनने दुसऱ्याच षटकात महत्त्वाच्या गोलंदाजाविरूद्ध अशी खेळी करत इंग्लंडला दणका देत दबाव टाकला.
सॅमसनने आपल्या डावाची चांगली सुरुवात केली पण त्याला मोठी धावसंख्या उभारता आली नाही. वेगवान सुरुवात करूनही संजू सॅमसन लवकर पॅव्हेलियनमध्ये परतला. संजूने २०चेंडूत ४ चौकार आणि एका षटकाराच्या मदतीने २६ धावा केल्या. जोफ्रा आर्चरने त्याला ऍटकिन्सनकरवी सीमारेषेजवळ झेलबाद केले.
गस ॲटकिन्सन हा त्याच्या कारकिर्दीतील केवळ चौथा टी-२० आंतरराष्ट्रीय सामना खेळत आहे. त्याला अजूनही या फॉरमॅटचा फारसा अनुभव नाही. पण त्याने कसोटी क्रिकेटमध्ये स्वत:ला सिद्ध केलंय. क्रिकेटच्या या सर्वात मोठ्या फॉरमॅटमध्ये त्याने हॅटट्रिकही आपल्या नावे केली आहे. इंग्लंडच्या या वेगवान गोलंदाजाने २०२४ च्या अखेरीस ही कामगिरी केली आहे. इंग्लंड आणि न्यूझीलंड यांच्यातील तीन सामन्यांच्या मालिकेतील दुसरा सामना वेलिंग्टन येथे खेळला गेला. यामध्ये त्याने न्यूझीलंडचे तीन फलंदाज नॅथन स्मिथ, मॅट हेन्री आणि टिम साऊदी यांना एकापाठोपाठ एक बाद करत हॅटट्रिक घेत इतिहास घडवला.
