विराट कोहली श्रेष्ठ की बाबर आझम? पाकिस्तानच्या गोलंदाजाने दिले उत्तर

ईएसपीएन क्रिकइन्फोशी बोलताना, शाहीनला रॅपिड-फायर राउंड दरम्यान कोहली आणि बाबर यांच्यापैकी कोण चांगले आहे? असा प्रश्न विचारण्यात आला होता. यावर त्याने ‘मला दोघेही आवडतात’, असे उत्तर दिले. अशाच प्रश्न त्याला रिजवान आणि जोस बटलरबद्दलही विचारण्यात आला होता. तिथे मात्र त्याने पाकिस्तानच्या यष्टिरक्षकाचे नाव निवडले. शिवाय, पीएसएल ही स्पर्धा आयपीएलपेक्षा चांगली असल्याचेही म्हटले आहे.

२४ ऑक्टोबर २०२१ रोजी दुबई येथे झालेल्या टी ट्वेंटी विश्वचषकादरम्यान कोहली आणि शाहीनची मैदानात एकमेव भेट झाली होती. विराट तेव्हा भारतीय संघाचा कर्णधार होता. विराटने पाकिस्तानच्या या वेगवान गोलंदाजाला डावाच्या सुरुवातीला षटकार ठोकला. त्याला नंतर लगेचच शाहीनने त्याला बाद केले. त्याने त्या सामन्यात ४१ धावांत भारताचे तीन बळी घेतले होते.

त्या सामन्यात बाबर आझम आणि मोहम्मद रिझवान यांना भारतीय गोलंदाज बाद करू शकले नव्हते. पाकिस्तानने हा सामना १० गडी राखून जिंकला होता. विश्वचषकात भारतीय संघाला पहिल्यांदाच पाकिस्तानच्या संघाकडून पराभूत व्हावे लागले होते. आता ऑस्ट्रेलियात खेळल्या जाणाऱ्या टी ट्वेंटी विश्वचषकात हे दोन्ही संघ पुन्हा एकदा समोरासमोर येणार आहेत. हा सामना २३ ऑक्टोबर २०२२ रोजी होणार आहे.