दक्षिण आफ्रिका ‘अ’ संघाविरूद्धच्या एकदिवसीय सामन्यात अफलातून द्विशतक झळकाविल्यानंतरही भारताचा सलामीवीर शिखर धवनने माझ्या व्दिशतकापेक्षा सचिन तेंडुलकर आणि वीरेंद्र सेहवाग यांची द्विशतके सर्वोत्तम असल्याचे म्हटले आहे.
“मी या खेळीने विक्रम केला आहे याची मला जाणीव आहे. माझ्यासाठी या धावा महत्वाच्या आहेत. परंतु, सामन्याच्या ४४ व्या षटकात मी बाद झालो त्याचे मला वाईट वाटले, कारण मी संपुर्ण पन्नास षटके फलंदाजी केली असती तर, तीनशे धावा करू शकलो असतो. पण, जी काही फलंदाजी केली त्यात मी आनंदी आहे असेही धवन पुढे म्हणाला. त्याचबरोबर सचिन आणि सेहवागचा विक्रम मोडणे हे माझ्या डोक्यातही नव्हते. या दोन क्रिकेट दिग्गजांनी केलेली द्विशतके आंतराष्ट्रीय स्तरावरची असून, त्याची तुलना माझ्या द्विशतकाशई होऊ शकत नाही. असेही धवनने स्पष्ट केले.
दक्षिण आफ्रिका ‘अ’ संघाविरुद्ध झालेल्या एकदिवसीय सामन्यात शिखर धवनने १५० चेंडूत २४८ धावांची खेळी साकारली आणि विक्रम रचला. याआधी भारतीय संघातून कोणत्याही फलंदाजाने एकदिवसीय सामन्यात इतकी मोठी खेळी केलेली नाही. केवळ सेहवाग आणि सचिन तेंडुलकरने द्विशतके ठोकली आहेत. भारतीय संघाने या सामन्यात ३९ धावांनी विजय मिळवीत अंतिम सामन्यात प्रवेश केला आहे.
