खानोलकर-मुरकर गटाचा अजित वाडेकरांना पाठिंबा

शिवाजी पार्क जिमखान्याच्या निवडणुकीमध्ये रंग चढू लागले असून हेगडे गटामधून अध्यक्षपदासाठी रिंगणात असलेले भारताचे माजी कर्णधार अजित वाडेकर यांना खानोलकर-मुरकर गटाने पाठिंबा जाहीर केला आहे. त्यामुळे आता अध्यक्षपदासाठी वाडेकर आणि भारताचे माजी क्रिकेटपटू प्रवीण अमरे यांच्यामध्ये थेट सामना होणार आहे. वाडेकर यांच्याबरोबर खानोलकर-मुरकर गटाने समाधान सरवणकर, श्रेयस खानोलकर, राजीव अढळराव, शेखर सुर्वे, योगेश पोवार यांनाही पाठिंबा दिला आहे.
‘आमचे आणि प्रवीण अमरे यांच्याशी काही वैर नाही. पण घरामध्ये वरिष्ठ व्यक्तीचा मान आपण ठेवत असतो. त्यामुळेच आम्ही वाडेकर यांना पाठिंबा देत आहोत. यामध्ये कोणतेच राजकारण नाही,’’ असे संजीव खानोलकर यांनी सांगितले.
खानोलकर-मुरकर गटाने या वेळी जाहीरनामा जाहीर करताना आतापर्यंत जिमखान्यासाठी केलेल्या कार्याची माहिती दिली आहे. त्याचबरोबर त्यांनी आपल्या गटाचे उमेदवारही जाहीर केले आहेत.