Shubman Gill has won the ICC Player of the Month award: भारत आणि पाकिस्तान यांच्यातील विश्वचषक सामन्यापूर्वी शुबमन गिलने आयसीसीचा पुरस्कार पटकावला आहे. त्याची सप्टेंबर महिन्यातील सर्वोत्तम पुरुष क्रिकेटपटू म्हणून निवड झाली आहे. गिलने सप्टेंबर महिन्यात एकदिवसीय सामन्यात ८० च्या सरासरीने ४८० धावा केल्या आणि हा पुरस्कार जिंकला. गिल व्यतिरिक्त मोहम्मद सिराज आणि डेव्हिड मलान हे देखील हा पुरस्कार जिंकण्याच्या शर्यतीत होते, पण शेवटी गिलनेच बाजी मारली आहे. हा पुरस्कार भारत-पाकिस्तान सामन्यापूर्वी त्याचा आत्मविश्वास वाढवेल. सलामीच्या फलंदाजाने आशिया कपमध्ये ७५.५ च्या सरासरीने ३०२ धावा केल्या होत्या, ज्यामध्ये अंतिम सामन्यात नाबाद २७* धावा केल्या होत्या. भारताने फायनलमध्ये श्रीलंकेचा १० गडी राखून पराभव केला. गिल या स्पर्धेत सर्वाधिक धावा करणारा खेळाडू ठरला होता. ऑस्ट्रेलियाविरुद्ध दोन डावांत १७८ धावा करून गिलने महिन्यातील सर्वोत्कृष्ट खेळाडू (आयसीसी प्लेयर ऑफ द मंथ) होण्याचा आपला दावा आणखी मजबूत केला. यासोबतच विश्वचषकाच्या तयारीचे संकेतही दिले. गिलने सप्टेंबरमध्ये ४८० धावा करताना झळकावली दोन शतके - सप्टेंबरमध्ये आशिया चषकादरम्यान बांगलादेशविरुद्ध १२१ धावा केल्यानंतर उजव्या हाताच्या फलंदाजाने ऑस्ट्रेलियाविरुद्ध दुसऱ्या एकदिवसीय सामन्यात १०४ धावा केल्या. गिलने गेल्या महिन्यातही तीन अर्धशतके झळकावली होती आणि त्या कालावधीत आठ डावात केवळ दोन वेळा तो पन्नासपेक्षा कमी धावांवर बाद झाला होता. त्याने दोन शतकांच्या जोरावर सप्टेंबरमध्ये ४८० धावा केल्या आहेत. हेही वाचा - IND vs PAK, World Cup 2023: भारत-पाक सामन्याबद्दल शोएब अख्तरचं मोठं वक्तव्य; म्हणाला, “हा सामना कमकुवत…” २४ वर्षीय या खेळाडूने ३५ सामन्यांमध्ये ६६.१ च्या सरासरीने आणि १०२.८४ च्या स्ट्राइक रेटने १९१७ धावा करून एकदिवसीय सामन्यांमध्ये अविश्वसनीय विक्रम केला आहे. तो आयसीसी पुरुषांच्या वनजे फलंदाजी क्रमवारीत दुसऱ्या क्रमांकावर आहे. गिल डेंग्यूच्या आजारपणामुळे क्रिकेट विश्वचषकात भारताचे सुरुवातीचे सामने खेळू शकला नाही, मात्र पाकिस्तानविरुद्धच्या सामन्यात तो खेळेल अशी अपेक्षा आहे. भारतीय संघातील उर्वरित खेळाडूंपूर्वी तो अहमदाबादला पोहोचला आणि गुरुवारी तासभर सरावही केला.
