खो-खो चाहत्यांसाठी उत्सुकतेची असलेली तिसरी आशियाई खो-खो स्पर्धा फेब्रुवारीत मध्य प्रदेशमध्ये आयोजित केली जाणार आहे. अखिल भारतीय खो-खो महासंघाच्या बारामतीमध्ये झालेल्या कार्यकारिणीच्या बैठकीत या निर्णयावर शिक्कामोर्तब करण्यात आला. या स्पर्धेचे निमंत्रक शरद जपे सांगितले की, ही स्पर्धा आयोजित करण्याची तयारी मध्य प्रदेश राज्य संघटनेने गतवर्षी आयोजित केलेल्या राष्ट्रीय स्पर्धेवेळी दर्शविली होती. मात्र त्याबाबत अंतिम निर्णय घेण्यात आला नव्हता. महासंघाच्या बैठकीत त्याबाबत अंतिम निर्णय घेण्यात आला. ही स्पर्धा फेब्रुवारीमध्ये इंदूर किंवा भोपाळ येथे घेण्यात येणार आहे. या स्पर्धेत बांगलादेश, चीन, सिंगापूर, श्रीलंका, जपान, नेपाळ, अफगाणिस्तान, पाकिस्तान व भारत हे देश सहभागी होणार आहेत. मध्य प्रदेशमधील भारतीय जनता पक्षाच्या खासदार सुमित्रा महाजन या खो-खो खेळाच्या चाहत्या असून त्यांनीच या स्पर्धेसाठी पुढाकार घेतला आहे. स्पर्धेची तांत्रिक जबाबदारी अखिल भारतीय खो-खो महासंघाच्या मार्गदर्शनाखाली मध्य प्रदेश संघटनेने उचलली आहे. पुरुष व महिला या दोन्ही विभागांमध्ये होणाऱ्या स्पर्धेत सहभागी होणारे खेळाडू, पंच, तांत्रिक अधिकारी व अन्य पदाधिकाऱ्यांची निवास, भोजन व प्रवास आदी व्यवस्था, पारितोषिके आदी खर्चाची जबाबादारी राज्य शासनातर्फे केली जाणार आहे. परदेशी खेळाडूंना व्हिसा मिळविण्याबाबत अडचणी येऊ नयेत यासाठी महाजन यांनी परराष्ट्र मंत्रालयाकडे विनंती केली आहे. या स्पर्धेकरिता भारतीय संघांची निवड करण्यासाठी येथे सुरू असलेल्या स्पर्धेतून पुरुष व महिला संघांतील प्रत्येकी संभाव्य ३० खेळाडूंची निवड केली जाणार आहे. * खो-खोमध्ये विभागीय स्पर्धा होणार!अन्य काही खेळांप्रमाणेच खो-खोमध्येही विभागीय अजिंक्यपद स्पर्धा सुरू केली जाणार आहे. पश्चिम, उत्तर, पूर्व, दक्षिण अशा चार विभागांत ही स्पर्धा घेतली जाणार आहे. सबज्युनिअर, ज्युनिअर मुले-मुली व वरिष्ठ पुरुष आणि महिला अशा गटात ही स्पर्धा घेतली जाईल. प्रत्येक विभागातील विजेता व उपविजेता संघ आंतरविभागीय अजिंक्यपद स्पर्धेसाठी पात्र ठरतील. दरवर्षी होणाऱ्या फेडरेशन करंडक स्पर्धेशिवाय ही स्पर्धा सुरू केली जाणार असल्यामुळे अधिकाधिक स्पर्धा खेळण्याची संधी खेळाडूंना मिळणार आहे. * नवीन नियमावलीस मान्यता!गेली काही वर्षे खो-खोच्या नवीन नियमावली तयार करण्याचे काम सुरू होते. त्याला आता मान्यता देण्यात आली आहे. ही नियमावली सर्व खेळाडूंपर्यंत पोहोचण्यासाठी प्रत्येक राज्यात पंचांकरिता उद्बोधक शिबीर आयोजित केले जाणार आहे. येथून पुढे दरवर्षी प्रत्येक राज्य संघटनेने पंचांचे शिबीर घेण्याची सूचनाही प्रत्येक राज्य संघटनेला कळविण्यात आली आहे. महासंघाच्या तांत्रिक समितीचे अध्यक्ष महेंद्र त्यागी यांच्या अध्यक्षतेखाली ही शिबिरे घेतली जाणार आहेत. या खेळात आता प्रायोगिक स्तरावर मॅटचा उपयोग सुरू करण्यात आला आहे. मॅटवर खेळताना खेळाडूंना काय अडचणी येत आहेत, याचा अभ्यास करून त्यानुसार नवीन मॅट करताना दुरुस्ती केली जाणार आहे. नवी दिल्ली येथील एका कंपनीस सध्या मॅट करण्याची जबाबदारी सोपविण्यात आली आहे. परदेशात या खेळाचा अधिकाधिक प्रसार व्हावा यासाठी अखिल भारतीय खो-खो महासंघातर्फे परदेशात प्रशिक्षक पाठविले जाणार आहेत. तसेच काही प्रदर्शनीय सामने आयोजित करण्याचा निर्णय घेण्यात आला. त्याकरिता स्वतंत्र निधी उभाही केला जाणार आहे.
