मराठमोळ्या स्मृती मंधानाची टी-20 क्रिकेटमध्ये सर्वोत्तम खेळीची नोंद

तिसऱ्या टी-20 सामन्यात भारतीय महिला संघाला न्यूझीलंडकडून पराभवाचा सामना करावा लागला. दोन धावांनी न्यूझीलंडच्या महिलांनी बाजी मारत मालिकेवर निर्विवाद वर्चस्व गाजवलं. 162 धावांच्या आव्हानाचा पाठलाग करताना भारतीय संघाकडून स्मृती मंधानाने धडाकेबाज अर्धशतकी खेळीची नोंद केली. स्मृतीने 86 धावांची खेळी करत भारताला विजयाच्या उंबरठ्यावर आणून ठेवलं. मात्र मोठा फटका खेळण्याच्या नादात स्मृती झेलबाद होऊन माघारी परतली. मात्र यादरम्यान स्मृतीने टी-20 क्रिकेटमधल्या आपल्या सर्वोत्तम कामगिरीची नोंद केली आहे.