World Cup 2023: “काही लोक म्हणत होते मी पुनरागमन…” सामन्यानंतर जसप्रीत बुमराहने टीकाकारांना दिले चोख प्रत्युत्तर

दुखापतीनंतर बुमराह आणखीनच जबरदस्त गोलंदाजी करत आहे

बुमराहने पुनरागमनाच्या तीन महिन्यांत आत्मविश्वास परत मिळवला आहे. तो सतत १४०+ च्या वेगाने चेंडू टाकत आहे. आता तो नेहमीपेक्षा जास्त भेदक गोलंदाजी करत आहे. पुनरागमनानंतर, बुमराहने एकदिवसीय आणि टी२० आंतरराष्ट्रीय सामन्यांच्या १३ डावांमध्ये २६ विकेट्स घेतल्या आहेत. त्याच्या अनुपस्थितीत क्रिकेट चाहत्यांनी अनेक प्रश्न उपस्थित केले होते. त्याच्यावर मीम्स करत ट्रोल केले. मात्र, मैदानाबाहेर असताना बुमराहने एनसीएमध्ये खूप मेहनत घेतली. त्याच्या अनुपस्थितीबद्दल टीका हो असताना त्याने बाहेर काय सुरु आहे, याकडे दुर्लक्ष केले. आता त्याने भारतीय संघात पुनरागमन केल्याबद्दल समाधान व्यक्त केले आहे.

हेही वाचा: Hardik Pandya Injury: टीम इंडियासाठी मोठी बातमी! हार्दिक पांड्याने नेटमध्ये सरावाला केली सुरुवात, कधी करणार संघात पुनरागमन?

बुमराह टीकाकारांना काय म्हणाला?

स्टार स्पोर्ट्सशी बोलताना बुमराह म्हणाला, “माझी पत्नी [स्पोर्ट्स प्रेझेंटर संजना गणेशन] देखील स्पोर्ट्स मीडिया विभागात काम करते. तर होय, माझ्या कारकिर्दीवर बरेच प्रश्न उपस्थिती झालेले मी ऐकले आहेत. मी कधीही परत येणार नाही किंवा पुनरागमन करू शकणार नाही, असे लोक बोलत होते. मात्र, या सर्व गोष्टींचा माझ्यावर काही फरक पडला नाही. मी या क्षणी खूप आनंदी असून संघात परत आलो आहे. मला क्रिकेट खेळायला किती आवडते याची जाणीव सर्वांना झाली. मी कोणत्याही विक्रमाचा पाठलाग करत नव्हतो. दुखापतीतून पुनरागमन करताना माझ्याकडे खूप वेळ आणि आजूबाजूला चांगले वातावरण होते. मी सकारात्मक गोष्टींकडे पाहत असून  शक्य तितका त्याचा आनंद घेण्याचा प्रयत्न करत आहे.

वर्ल्ड कपमध्ये बुमराहची चमकदार कामगिरी

बुमराहने वर्ल्ड कपमध्ये आतापर्यंत सहा सामन्यांत १४ विकेट्स घेतल्या आहेत. इंग्लंडविरुद्धच्या विजयातही त्याने महत्त्वाची भूमिका बजावली आणि ३२ धावांत तीन विकेट्स घेतल्या. त्याच्या मदतीने भारताने २३० धावांचा पाठलाग करणाऱ्या इंग्लंड संघाला १२९ धावांत रोखले. इंग्लंडविरुद्धचा सामना भारतासाठी चांगलं आव्हान असल्याचं बुमराहने मान्य केलं. तसेच, धावांचे रक्षण करताना आपले मत मांडले.

हेही वाचा: Pakistan Cricket: पाकिस्तान क्रिकेटमध्ये नवं वादळ! विश्वचषकातील खराब कामगिरी अन् इंझमाम-उल-हकने दिला तडकाफडकी राजीनामा

इंग्लंडविरुद्धच्या सामन्याबाबत बुमराहचे वक्तव्य

जसप्रीत म्हणाला, “संघ दडपणाखाली होता, हे आमच्यासाठी चांगले आव्हान होते. आम्ही सुरुवातीला काही विकेट्स गमावल्या. आम्हाला मैदानावरही दडपण जाणवत होते आणि विजयासाठी खूप प्रयत्न करावे लागले. या निकालाने खूप आनंद झाला. हा निकाल आमच्यासाठी खरोखरच आत्मविश्वास वाढवणारा होता कारण, आम्ही प्रथम क्षेत्ररक्षण करत होतो. आम्ही काही काळापासून धावांचा पाठलाग करत सामना जिंकत आहोत. मी खेळलेल्या शेवटच्या मालिकेतही भारताने लक्ष्याचा पाठलाग केला होता. अशा स्थितीत धावांचा बचाव करताना बरे वाटले.”

तो पुढे म्हणाला, “सामान्यतः जेव्हा तुम्ही नवीन चेंडूने गोलंदाजी करता तेव्हा तुम्ही स्विंग पाहता. जिथे मदत नसते तिथे तुम्ही फक्त चांगली लेंथवर गोलंदाजी करण्याचा प्रयत्न करा आणि शक्य तितक्या धावा कमी द्या. लखनऊमध्ये चेंडू थोडासा स्विंग होत होता, पण मी जास्त काही उघड करणार नाही. फक्त एवढेच सांगेन, मी चेंडूला शक्य तितका सीम करण्याचा प्रयत्न केला ज्यामुळे थोडी मदत होत होती. यानंतर मी सीम गोलंदाजीमध्ये बदल केला.”