आश्विनच्या फिरकीनं मैदानात रचला इतिहास, पण गांगुलीच्या ट्वीटची तुफान चर्चा, म्हणाला, “चांगल्या खेळपट्टीवर…”

भारत आणि ऑस्ट्रेलिया यांच्यात सुरु असलेल्या बॉर्डर गावसकर ट्रॉफीचे सुरुवातीचे तीन कसोटी सामने तीन दिवसांतच आटोपले. या सामन्यांमध्ये फिरकीपटूंच्या गोलंदाजीची कमाल पाहायला मिळाली. याआधीच्या सामन्यांमध्ये गोलंदाजांसाठी खेळपट्टी अनुकूल असल्याचं चित्र होतं. मात्र अहमदाबादच्या नरेंद्र मोदी स्टेडियमध्ये सुरुवातीच्या दोन दिवसांत ऑस्ट्रेलियाच्या फलंदाजांना धावांचा सूर गवसला. पहिल्या डावात ऑस्ट्रेलियाने सर्वबाद ४८० धावा केल्या. यामध्ये उस्मान ख्वाजाने १८० तर कॅमरून ग्रीनने ११४ धावांची शतकी खेळी केली.

नक्की वाचा – RCB vs UPW : कर्णधार अ‍ॅलिसा हिलीने मैदान गाजवलं, यूपी वॉरियर्सचा १० गडी राखून RCB वर दणदणीत विजय

इथे पाहा ट्वीटर पोस्ट

दरम्यान, आश्विनने भारतीय संघाकडून या इनिंगमध्ये ४७.२ षटकांची गोलंदाजी करून ९१ धावा देत ६ विकेट्स घेण्याची चमकदार कामगिरी केली. त्यानंतर आश्विनच्या गोलंदाजीबद्दल बोलताना सौरव गांगुलीने ट्वीट करत म्हटलं, आश्विनला चांगल्या खेळपट्टीवर भेदक गोलंदाजी करताना पाहून छान वाटलं. क्लास नेहमीच दिसेल. हा एक चांगला कसोटी सामना होईल, अशी आशा आहे. अवघड खेळपट्टीवर खेळल्यानंतर भारतीय फलंदाजांसाठी या मालिकेत अशाप्रकारच्या खेळपट्टीवर चांगली फलंदाजी करण्याची संधी आहे.

आश्विन ठरला बॉर्डर गावस्कर ट्रॉफीत सर्वाधिक विकेट घेणारा गोलंदाज

भारताकडून आश्विनने बॉर्डर गावसकर ट्रॉफीत सर्वाधिक विकेट घेतल्या आहेत. ऑस्ट्रेलियाच्या विरोधात कसोटी क्रिकेटमध्ये आश्विनच्या नावावर ११३ विकेट्सची नोंद झाली आहे. याआधी हा विक्रम भारताचा माजी कर्णधार अनिल कुंबळेच्या नावावर होता. कुंबळेने ऑस्ट्रेलियाच्या विरुद्ध कसोटी क्रिकेटमध्ये १११ विकेट घेतल्या होत्या.