Euro Cup 2024 Final: युरो कप २०२४ चा अंतिम सामना आतापर्यंत उत्कृष्ट कामगिरी करणाऱ्या दोन सर्वोत्तम संघ स्पेन आणि इंग्लंड यांच्यात खेळवला गेला. दोन्ही संघांमध्ये चुरशीची स्पर्धा झाली ज्यामध्ये अखेरीस स्पॅनिश संघाने अंतिम सामना २-१ने जिंकला आणि विजेतेपदावरही आपले नाव कोरले. यासह स्पेन ४ वेळा युरो कप जिंकणारा पहिला देश बनला आहे. मात्र, चौथी ट्रॉफी जिंकण्यासाठी त्यांना तब्बल १२ वर्षे प्रतीक्षा करावी लागली.
युरो कप २०२४ चा अंतिम सामना १५ जुलै रोजी बर्लिन, जर्मनी येथे स्पेन आणि इंग्लंड यांच्यात खेळला गेला. दोन्ही संघांमध्ये रोमांचक सामना पाहायला मिळाला. तब्बल १२ वर्षांच्या प्रदीर्घ प्रतिक्षेनंतर स्पेनने युरो चॅम्पियनशिप जिंकली. स्पेनने चौथ्यांदा युरो कपचे विजेतेपद पटकावले आहे. इतर कोणत्याही संघाने आतापर्यंत इतक्या वेळा युरो कप जिंकलेला नाही. २०२० च्या युरो कपच्या फायनलमध्ये पराभूत झाल्यानंतर आता इंग्लंडला २०२४ च्या युरो कपच्या फायनलमध्येही पराभवाला सामोरे जावे लागले. इंग्लंडला आतापर्यंत युरो चॅम्पियनशिप जिंकण्यात यश मिळालेले नाही.
Euro Cup Final Spain vs England: बरोबरीत होता सामना
स्पेन आणि इंग्लंड यांच्यातील अंतिम सामन्यात इतकी जबरदस्त चढाओढ सुरू होती की पहिला गोल ४७व्या मिनिटाला झाला. ज्यामध्ये स्पॅनिश खेळाडू निकोने पहिला गोल केला. या गोलसह स्पेनने सामन्यात निश्चितपणे १-० अशी आघाडी घेतली होती, परंतु यानंतर इंग्लंडने झटपट पुनरागमन केले आणि सामन्याच्या ७३व्या मिनिटाला पाल्मरने गोलरक्षकाला चुकवत जबरदस्त गोल केला, त्यामुळे सामना १-१ असा बरोबरीत आला.
Euro Cup 2024: ८६व्या मिनिटाला गोल अन् स्पेन विजयी
सामना १-१ असा बरोबरीत आणत इंग्लंडने अतिशय आक्रमक खेळ करण्यास सुरुवात केली. त्याला प्रत्युत्तरात स्पेनचा संघही तसाच खेळताना दिसला आणि खेळाच्या ८६व्या मिनिटाला स्पेनचा अनुभवी खेळाडू ओयारझाबालने गोल करून संघाला २-१ अशी आघाडी मिळवून दिली. ९० मिनिटांचा खेळ संपल्यानंतर अतिरिक्त वेळेसाठी दिलेल्या ४ मिनिटांतही इंग्लंडचा संघ एकही गोल करण्यात यशस्वी होऊ शकला नाही आणि स्पेनने १२ वर्षांनंतर युरो कप जिंकला.
© IE Online Media Services (P) Ltd