काही दिवसांपूर्वी एका अव्वल भारतीय महिला सायकलपटूने राष्ट्रीय प्रशिक्षक आरके शर्मा यांच्यावर लैंगिक छळाचे गंभीर आरोप लावले होते. त्यानंतर, भारतीय क्रीडा क्षेत्रात मोठी खळबळ उडाली होती. आरके शर्मांच्या अचडणींमध्ये आता आणखी वाढ होताना दिसत आहे. आता एका महिला सायकलपटूनेदेखील शर्मांच्याविरोधात तक्रार केली आहे. ‘प्रशिक्षक शर्मांनी आपल्याला दोनदा तिला मारहाण केली होती. एवढेच नाही तर मी समलैंगिक असल्याचा आरोपही केला होता’, असे या सायकलपटूने सांगितले आहे.
सध्याची राष्ट्रीय चॅम्पियन आणि आंतरराष्ट्रीय सुवर्णपदक विजेती डेबोरा हेरोल्डने इंडियन एक्सप्रेसला दिलेल्या मुलाखतीत सांगितले की, ‘तिला जाणीवपूर्वक राष्ट्रीय संघातून वगळण्यात आले होते. कारण, आरके शर्मा आणि त्यांची सहाय्यक गौतमणी देवी यांना डेबोरा समलैंगिक नात्यामध्ये असल्याचा संशय होता.’ डेबोराशिवाय आणखी दोन सायकलपटूंनी देखील इंडियन एक्सप्रेसला सांगितले की, त्यांनी भारतीय क्रीडा प्राधिकरणाच्या ‘अंतर्गत तक्रार’ समितीकडे आरके शर्मा आणि गौतमणी देवीविरोधा तक्रार दाखल केली आहे. ते दोघे महिला खेळाडूंना सतत धमकावत आहेत. त्यामुळे खेळाडूंच्या कामगिरीवर परिणाम होत आहे.
हेही वाचा – VIDEO : ‘पंतसेने’चे राजकोटमध्ये आगमन तर, कसोटी संघाचे इंग्लंडसाठी उड्डाण
डेबोरा हेरोल्ड २०१२ पासून भारतीय सायकलपटू संघाचा भाग आहे. ती २०१४ पासून आरके शर्मा यांच्याकडून प्रशिक्षण घेत आहे. तिने दिलेल्या माहितीनुसार, २०० मीटर स्प्रिंट आणि ५०० मीटर टाइम ट्रायल इव्हेंटमध्ये देशातील सर्वात वेगवान सायकलपटू असूनही २०१८ ते २०१९ च्या राष्ट्रीय अजिंक्यपद स्पर्धेत तिला संघाबाहेर ठेवण्यात आले होते. डेबोरा म्हणाली, “गौतमणी देवीला वाटले की मी एका सहकारी महिला सायकलपटूसोबत रिलेशनशिपमध्ये आहे. त्यांनी मला खूप त्रास दिला. माझ्याकडे दुर्लक्ष केले आणि बाकीच्या सायकलपटूंपासून मला वेगळे केले. शेवटी, मला राष्ट्रीय शिबिरातूनही बाहेर काढण्यात आले. पण, प्रत्यक्षात मी समलैंगिक नाही…. आमची फक्त चांगली मैत्री आहे.”
‘आरके शर्माने आपल्याला प्रशिक्षणानंतर मसाज देऊन एकाच खोलीत राहण्यास भाग पाडले. मला जबरदस्तीने स्वत:कडे ओढण्याचा प्रयत्न केला. मे महिन्यात स्लोव्हेनियातील एका शिबिरात त्याच्यासोबत झोपण्यासही सांगितले’, असे आरोप काही दिवसांपूर्वी एका आघाडीच्या सायकलपटूने केले होते. याबाबत तिने भारतीय क्रीडा प्राधिकरणाकडे (एसएआय) शर्माच्या विरोधात लैंगिक छळाची तक्रार दाखल केली आहे. त्यानंतर डेबोरानेदेखील छळ झाल्याचे आरोप केले आहेत.
या आरोपांबद्दल विचारले असता, गौतमणी देवी यांनी इंडियन एक्स्प्रेसला सांगितले की, सायकलिंग फेडरेशन ऑफ इंडियाने (सीएफआय) जे करण्यास सांगितले होते तेच आपण केले. तर, आरके शर्मा यांनी याबाबत अद्याप कोणतीही प्रतिक्रिया दिली नाही.
