IPL 2018 : हैदराबादी बिर्याणी मुंबई वडापाववर पडली भारी, अखेरच्या चेंडूवर जिंकला सामना

मुंबई इंडियन्स प्रथम फलंदाजी करण्यासाठी मैदानात उतरली असता कर्णधार रोहित शर्मा फक्त ११ धावांवर आऊट झाला. सिद्धार्थ कौलने सहाव्या ओव्हरमध्ये इशान किशन (९) आणि इव्हिन लुईस (२९) यांची विकेट घेत मुंबईसमोर अडचण निर्माण केली. कृणाल पांड्यादेखील (१५) संघाचा डाव सावरुन शकला नाही. सुर्यकुमार यादव आणि किरन पोलार्ड यांनी संघाला सावरण्याचा पुरेपूर प्रयत्न केला. दोघांनीही २८-२८ धावांची खेळी केली. हैदराबादसमोर मुंबईने १४७ धावांचं आव्हान ठेवलं होतं.

हैदराबाद संघ १४७ धावांचं माफक आव्हान अत्यंत सहजपणे पार करेल अशी परिस्थिती झाली होती. रिद्धिमान साहा आणि शिखर धवनने पहिल्या विकेटसाठी ६२ धावांची खेळी केली, ज्यामुळे संघाला चांगली सुरुवात मिळाली. साहाने २२ धावा केल्या, तर शिखर धवनने २८ चेंडूत ८ चौकारांच्या मदतीने ४५ धावा केल्या. मात्र यानंतर केन विल्यिमसन (६), मनीष पांडे (११) आणि शाकिब अल हसन (१२) महत्वपूर्ण खेळी करु शकले नाहीत. १२४ धावांवर हैदराबादने पाच विकेट्स गमावल्या होत्या. युसूफ पठाण आणि दीपक हुडा अत्यंत सहजपणे संघाला सामना जिंकून देईल असं वाटत होतं. पण मुंबईने पुनरागमन करत हैदराबादची चिंता वाढवली होती. पण अखेरच्या चेंडूपर्यंत रंगलेला हा सामना अखेर हैदराबादने जिंकला.