आयपीएलच्या १६ व्या हंगामातील ३४ वा सामना सनरायझर्स हैद्राबाद आणि दिल्ली कॅपिटल्स यांच्यात हैद्राबादच्या राजीव गांधी इंटरनॅशनल स्टेडियममध्ये होत आहे. दिल्ली कॅपिटल्सने नाणेफेक जिंकून प्रथम फलंदाजीचा निर्णय घेतला होता. त्यानंतर दिल्लीने प्रथम फलंदाजी करत २० षटकात ८ विकेट्स गमावत १४४ धावा केल्या होत्या. परंतु, १४५ धावांचा पाठलाग करताना सनरायझर्स हैद्राबादची दमछाक झाली. अटीतटीच्या सामन्यात दिल्लीने हैद्राबादचा पराभव केला. हैद्राबादने २० षटकात ६ विकेट्स गमावत १३७ धावा केल्या. दिल्लीच्या गोलंदाजांनी हैद्राबादवर दणदणीत विजय मिळवला.
सनरायझर्स हैद्राबादच्या गोलंदाजांनी भेदक मारा करून दिल्ली कॅपिल्सच्या फलंदाजांना माघारी पाठवलं. नॉर्खियाने हॅरी ब्रुकला ७ धावांवर असताना क्लीन बोल्ड केलं. त्यानंतर मयंक अग्रवालने सावध खेळी करत सनरायझर्सचा डाव सावरला. मयंकने ३९ चेंडूत ४९ धावांची खेळी साकारली. मात्र, अक्षर पटेलच्या गोलंदाजीवर मयंक झेलबाद झाला आणि सनरायझर्सला मोठा धक्का बसला. त्यानंतर इशांत शर्माने राहुल त्रिपाठीला १५ धावांवर झेलबाद केलं. कुलदीप यादवच्या फिरकीवर अभिषेक शर्मा ५ धावांवर बाद झाला. तर कर्णधार एडन मार्करम अवघ्या तीन धावांवर असताना अक्षर पटेलने त्रिफळा उडवला. त्यानंतर सनरायझर्सला हेन्री क्लासेनने चौफेर फटकेबाजी करून विजयाच्या दिशेनं नेलं होतं. मात्र, नॉर्खियाच्या गोलंदाजीवर क्लासेन १९ चेंडूत ३१ धावा करून बाद झाला.
त्यानंतर मिचेल मार्शने सावध खेळी करत २५ धावा साकारल्या. पण मार्शही नटराजनच्या गोलंदाजीवर बाद झाला आणि दिल्लीला दुसरा धक्का बसला. त्यानंतर कर्णधार डेविड वार्नर, सर्फराज खान आणि अमन खान वॉशिंग्टन सुंदरने बाद केलं अन् दिल्लीची फलंदाजी गडगडली. पण अक्षर पटेल आणि मनिष पांडेच्या जबरदस्त भागिदारीमुळं दिल्लीने २० षटकात ९ विकेट्स गमावत १४४ धावा केल्या होत्या. त्यामुळे सनरायझर्सला २० षटकात विजयासाठी १४५ धावांचं लक्ष्य गाठावं लागणार होतं. सनरायझर्स हैद्राबादकचा फिरकीपटू वॉशिंग्टन सुंदरने एकाच षटकात तीन फलंदाजांना बाद करून दिल्ली कॅपिटल्सला मोठा धक्का दिला.
सुंदरने डेविड वार्नरला २१ धावांवर असताना बाद केलं. त्यानंतर लगेच सर्फराज खान सुंदरच्या गोलंदाजीचा शिकार झाला. सर्फराझ ९ धावा करून तंबुत परतला. त्यानंतर अमन खानलाही ४ धावांवर बाद करण्यात सुंदरला यश आलं. एकाच षटकात तीन फलंदाज बाद झाल्याने दिल्लीची धावसंख्या मंदावली. अक्षर पटेलने ३४ चेंडूत ३४ धावा तर मनिष पांडेने २७ चेंडूत ३४ धावांची खेळी साकारली.
