सुरेश रैनाच्या मामेभावासहित आणखी एकाचा हिट अँड रन केस प्रकरणात मृत्यू, नेमकं काय घडलं?

मिळालेल्या माहितीनुसार, कांगडा येथील गग्गल विमानतळाजवळील गग्गल पोलीस ठाण्याअंतर्गत हे हिट अँड रन प्रकरण समोर आले आहे. घटनेची माहिती मिळताच पोलिसांनी फरार टॅक्सी चालकाचा पाठलाग करून त्याला मंडी येथून अटक केली. बुधवारी रात्री ११.३०च्या सुमारास गग्गल येथील हिमाचल टिंबरजवळ अज्ञात टॅक्सी चालकाने स्कूटीला धडक दिली. स्कूटीला धडक दिल्यानंतर चालक घटनास्थळावरून पळून गेला.

हेही वाचा- T20 World Cup मधील टीम इंडियाचे सामने भारतीय वेळेनुसार किती वाजता खेळवले जाणार? जाणून घ्या संपूर्ण वेळापत्रक

या अपघातात स्कूटी चालक सौरभ कुमार (२७) आणि शुभम यांचा जागीच मृत्यू झाला आहे. सौरभ हा गग्गल येथील तर शुभम हा कुठमान येथील रहिवासी होता. सीसीटीव्ही कॅमेऱ्याच्या फुटेजच्या आधारे गग्गल पोलिसांनी आरोपी शेरसिंग याला वाहनासह जिल्हा मंडी येथून अटक केली आहे. सुरेश रैन्नाचे आजोळ गग्गल येथे आहे.

अपघाताची माहिती देताना कांगडा येथील एसपी शालिनी अग्रीहोत्री यांनी सांगितले की, मंगळवारी रात्री गग्गल पोलिस स्टेशन अंतर्गत हिट अँड रनचे प्रकरण समोर आले आहे. या अपघातात दोन तरुणांचा मृत्यू झाला आहे. गागल येथील सौरभ आणि बनोई येथील शुभम अशी मृतांची नावे आहेत. या तरुणांना धडक देऊन वाहन चालकाने घटनास्थळावरून पळ काढला. घटनेची माहिती मिळताच पोलिसांनी फरार चालकाचा पाठलाग केला. त्याला मंडी येथून ताब्यात घेण्यात आले आणि त्याला पुन्हा कांगडा येथे आणले जात आहे. आरोपीविरुद्ध गुन्हा दाखल करण्यात आला असून पुढील कारवाई करण्यात येत आहे.