T20 WC: ऑस्ट्रेलियाच्या डेविड वॉर्नरला सूर गवसला; वेस्ट इंडिज विरूद्धच्या सामन्यात झळकावलं अर्धशतक

आयपीएलनंतर वर्ल्डकप सामने सुरू झाले आणि ऑस्ट्रेलियाचा पहिला सामना दक्षिण आफ्रिकेविरुद्ध झाला. या सामन्यात डेविड वॉर्नर सलामीला आला होता. मात्र १५ चेंडूत १४ धावा करून बाद झाला. त्यानंतर श्रीलंकेविरुद्धच्या सामन्यात वॉर्नरने जोरदार कमबॅक केलं. ४२ चेंडूत ६५ धावा केल्या. या खेळीत १० चौकारांचा समावेश होता. त्यानंतर जबरदस्त फॉर्मात असलेल्या इंग्लंड विरुद्धच्या सामन्यात अवघी १ धाव करून तंबूत परतला. बांगलादेश विरुद्धच्या सामन्यात १४ चेंडूत १८ धावा केल्या. त्यानंतर आता वेस्ट इंडिजविरुद्धच्या सामन्यात अर्धशतकी खेळी केली.

आयपीएल २०२१च्या दुसऱ्या टप्प्यातील सामने यूएईमध्ये खेळले गेले. मात्र यादरम्यान डेव्हिड वॉर्नरला केवळ २ सामन्यात खेळण्याची संधी मिळाली. ६ सामन्यांत तो संघाबाहेर होता. ”हे माझ्यासाठी कठीण दिवस होते. मला का बाहेर फेकले गेले हे माझ्यासाठी अनाकलनीय असले तरी.” असं डेविड वॉर्नरने सांगितलं होतं.