IND vs AFG : भारताविरुद्धच्या टी-२० मालिकेसाठी अफगाणिस्तानचा संघ जाहीर, आयपीएलच्या अनेक स्टार खेळाडूंचा संघात समावेश

टी-२० मालिकेतील पहिला सामना ११ जानेवारीला मोहालीत होणार आहे. दुसरा सामना १४ जानेवारीला इंदूरमध्ये तर तिसरा सामना १७ जानेवारीला बंगळुरूमध्ये खेळवला जाईल. या मालिकेसाठी अफगाणिस्तान संघात दोन बदल करण्यात आले आहेत. मुजीब उर रहमान नुकत्याच यूएईविरुद्धच्या तीन सामन्यांच्या टी-२० मालिकेत संघाचा भाग नव्हता. तो पुनरागमन करत आहे. इकराम अलीखिल हा यूएईविरुद्ध राखीव खेळाडू होता, तो आता मुख्य संघात बॅकअप यष्टीरक्षक-फलंदाज म्हणून आहे.

भारताविरुद्धच्या मालिकेसाठी अफगाणिस्तान संघ –

इब्राहिम झद्रान (कर्णधार), रहमानउल्ला गुरबाज (यष्टीरक्षक), इकराम अलीखिल (यष्टीरक्षक), हजरतुल्ला झाझाई, रहमत शाह, नजीबुल्ला झदरन, मोहम्मद नबी, करीम जनात, अजमोउल्ला ओमरझाई, शरफुद्दीन अश्रफ, मुजीब उर रहमान, फजलहक फारुकी, फरीद अहमद, नवीन उल हक, नूर अहमद, मोहम्मद सलीम, कैश अहमद, गुलबदिन नायब, राशिद खान.

हेही वाचा – AUS vs PAK : “लोकांनी मला एक…”, कसोटी आणि वनडेमधील निवृत्तीनंतर डेव्हिड वॉर्नरचे मोठे विधान

राशिद खान खेळणे कठीण –

अफगाणिस्तान संघाचा नियमित कर्णधार राशिद खानचा संघात समावेश करण्यात आला आहे, परंतु तो कोणत्याही सामन्यात खेळणार नाही, असे अफगाणिस्तान क्रिकेट बोर्डाने एका प्रसिद्धीपत्रकात म्हटले आहे. नुकतीच त्याच्या पाठीवर शस्त्रक्रिया झाली असून तो या दुखापतीतून सावरत आहे. दरम्यान, इब्राहिम झद्रान संघाची धुरा सांभाळेल, ज्याने अलीकडेच अफगाणिस्तानला शारजाह येथे यूएई विरुद्ध २-१ने मालिका जिंकून दिली.

हेही वाचा – David Warner : ‘…म्हणून माझी आई डेव्हिडला ‘शैतान’ म्हणते’, वॉर्नरच्या निवृत्तीनंतर ऑस्ट्रेलियन खेळाडूचा खुलासा

रोहित-कोहली भारतीय संघात पुनरागमन करू शकतात –

या मालिकेसाठी विराट कोहली आणि रोहित शर्मा भारतीय संघात पुनरागमन करू शकतात. या दोन्ही दिग्गज खेळाडूंनी २०२२ टी-२० विश्वचषक उपांत्य फेरीनंतर देशासाठी एकही टी-२० सामना खेळलेला नाही. या वर्षी जूनमध्ये होणाऱ्या टी-२० विश्वचषकाला डोळ्यासमोर ठेवून कोहली आणि रोहितचा टी-२० संघात समावेश केला जाऊ शकतो.