Today is Kapil Dev’s 65th birthday : भारतीय संघाचे माजी कर्णधार कपिल देव आज त्यांचा ६५ वा वाढदिवस साजरा करत आहेत. आज सर्वजण कपिल देव यांना त्यांच्या खास दिवसासाठी शुभेच्छा देत आहेत. कपिल देव हे टीम इंडियाचे ते कर्णधार आहेत, ज्यांनी त्यांच्या नेतृत्वाखाली भारताला पहिला विश्वचषक जिंकून दिला. हा तो काळ होता जेव्हा क्रिकेटमध्ये वेस्ट इंडिज आणि ऑस्ट्रेलियासारख्या संघांना पराभूत करणे इतके सोपे नव्हते.
त्या काळात कपिल देव यांच्या नेतृत्वाखालील भारतीय संघाने फक्त वेस्ट इंडिजसारख्या संघाला पराभूत केले नाही, तर विश्वचषक विजेतेपदही पटकावले. १९८३ च्या विश्वचषकात कपिल देव यांच्या नेतृत्वाखाली टीम इंडियाने प्रथमच आयसीसीचे विजेतेपद पटकावले होते. कपिल देव यांच्या नेतृत्वाखालील विश्वचषक विजयाने भारतीय क्रिकेटला एक नवा मार्ग दाखवला होता.
कपिल देव यांनी एकही नो-बॉल टाकला नाही का?
१९८३ च्या विश्वचषकात टुनब्रिज वेल्स येथे झिम्बाब्वेविरुद्ध खेळलेली १७५ धावांची नाबाद खेळी कोण विसरू शकेल? तसेच कपिल देव यांच्याबद्दल अनेक कथा प्रसिद्ध आहेत. कपिल देव यांनी त्यांच्या आंतरराष्ट्रीय कारकिर्दीत एकही नो-बॉल टाकला नाही, असे अनेकांचे मत आहे. यासंबंधीच्या अनेक पोस्ट सोशल मीडियावर पाहायला मिळतात.
हेही वाचा – T20 World Cup 2024 : टी-२० विश्वचषक स्पर्धेचे वेळापत्रक जाहीर! ‘या’ तारखेला होणार भारत-पाक सामना
कपिल देव यांच्याबद्दल लोकांचा हा दावा चुकीचा आहे. कारण १९९४ मध्ये खेळल्या गेलेल्या सिंगर वर्ल्ड सीरिजच्या तिसऱ्या सामन्यात कपिल देव यांनी ऑस्ट्रेलियाविरुद्ध नो-बॉल टाकला होता. त्या सामन्यात दोन नो-बॉल टाकले होते. कपिलशिवाय भारताच्या मनोज प्रभाकरनेही नो-बॉल टाकला होता. त्या सिंगर वर्ल्ड सिरीजमध्ये भारताव्यतिरिक्त पाकिस्तान, ऑस्ट्रेलिया आणि यजमान श्रीलंका सहभागी झाले होते. अंतिम सामन्यात भारताने श्रीलंकेचा सहा गडी राखून पराभव केला.
हेही वाचा – सिडनीच्या खराब ‘आउटफिल्ड’वर पाकिस्तानचा खेळाडू दुखापत होण्यापासून थोडक्यात बचावला, VIDEO होतोय व्हायरल
कपिल देव यांची क्रिकेट कारकीर्द –
भारतीय संघाचा माजी कर्णधार आणि जगातील सर्वात धोकादायक अष्टपैलू खेळाडूंपैकी एक, कपिल देव यांनी टीम इंडियासाठी २२५ एकदिवसीय आणि १३१ कसोटी सामने खेळले. कपिल देव यांनी २२५ एकदिवसीय सामन्यांच्या २२१ डावांमध्ये ३७८३ धावा केल्या. या कालावधीत त्याने एक शतक आणि १४ अर्धशतके झळकावली. याशिवाय १३१ कसोटी सामन्यांच्या १८४ डावांमध्ये कपिल देवच्या नावावर ५२४८ धावा आहेत. कसोटीत त्याने ८ शतके आणि २७ अर्धशतके केली आहेत. कसोटी क्रिकेटमध्ये गोलंदाजी करताना कपिल देव यांनी ४३४ आणि एकदिवसीय क्रिकेटमध्ये २५३ विकेट्स घेतल्या. कपिल देव यांची क्रिकेट कारकीर्द अशी होती.
