पदकविजेत्या मीराबाईच्या कर्णफुलांनी वेधलं लक्ष; पाच वर्षापूर्वी आईनं…..

“मी तिची कर्णफुले टीव्हीवर बघितली होती. २०१६ रियो ऑलिम्पिकपूर्वी दिली होती. माझ्याजवळील सोनं आणि बचत मोडून मी ती केली होती. यामुळे नशीब चमकेल आणि तिला यश मिळेल असं मला वाटत होतं”, असं लीमा यांनी पीटीआयशी बोलताना सांगितलं. मीराबाईंनी टोक्यो ऑलिम्पिक स्पर्धेत पदक जिंकल्यानंतर तिच्या घरी उपस्थित असलेल्या नातेवाईक आणि मित्रांनी एकच जल्लोष केला.

I am really happy on winning silver medal in #Tokyo2020 for my country pic.twitter.com/gPtdhpA28z

— Saikhom Mirabai Chanu (@mirabai_chanu) July 24, 2021

मीराबाईचा संघर्ष

कनिष्ठ गटातील मीराच्या व्यावसायिक कारकीर्दीला जेव्हा प्रारंभ झाला, तेव्हा तिच्यापुढे अनंत अडचणी होत्या. तिचे प्रशिक्षक तिला आहाराचा तक्ता द्यायचे. त्यात चिकन आणि दूध हे महत्त्वाचे घटक असायचे. मात्र त्या तक्त्याला न्याय देऊ शकणारी आर्थिक पुंजी तिच्या कुटुंबीयांकडे नव्हती; परंतु तिने हिमतीने अशा अनेक अडचणींवर मात केली. २०१३ मध्ये कनिष्ठ राष्ट्रीय अजिंक्यपद वेटलिफ्टिंग स्पर्धेत तिला सर्वोत्तम लिफ्टर हा मान मिळाला. २०११च्या आंतरराष्ट्रीय युवा अिजक्यपद स्पर्धेत आणि कनिष्ठ गटाच्या दक्षिण आशियाई अजिंक्यपद स्पर्धेत तिने सुवर्णपदकावर नाव कोरले. तिच्या याच कामगिरीमुळे ती भारताचे भविष्य असल्याची ग्वाही क्रीडा क्षेत्राला मिळाली होती.