Video : ‘अरे… माझी बाटली गेली कुठे?’; टेनिस कोर्टवर फेडररची फजिती

सामना सुरू असताना दोन सेटच्या मध्ये खेळाडू पाणी पिण्याची विश्रांती घेतात. त्यावेळी ते बाजूला बसतात. त्याचप्रमाणे फेडररही पाणी पिण्यासाठी बाकावर बसला. त्याच्या पुढ्यात दोन बाटल्या पडलेल्या होत्या. त्यामुळे त्याने एक बाटली पाणी पिण्यासाठी उचलली आणि दुसरी बाटली खाली ठेवली. खाली ठेवलेली बाटली नीट न ठेवल्यामुळे पडली आणि घरंगळत फेडरर बसलेल्या बाकाच्या खालून मागच्या बाजूला गेली. फेडररला मात्र काही समजू शकले नाही. बाचली गेली तरी कुठे? अशाप्रकारचे भाव चेहऱ्यावर ठेवत फेडरर बाकाखाली वाकून बघू लागला. त्यानंतर त्याने टेनिसच्या रॅकेटने बाटली पुढे ओढण्याचा प्रयत्नदेखील केला, पण त्याला ते शक्य झाले नाही. अखेर तेथील बॉलबॉयने मागच्या बाजूला आलेली बाटली फेडररला उचलून आणून दिली. फेडररची झालेली फजिती पाहून काही काळ चाहत्यांमध्ये हशा पिकल्याचेही पहायला मिळाले.

दरम्यान, सुमितने त्याच्या अमेरिकन खुल्या टेनिस स्पर्धेला स्वप्नवत सुरूवात केली होती. त्याने पहिल्याच सेटमध्ये टेनिसचा राजा असलेल्या फेडररला ६-४ असे पराभूत केले होते. पण त्यानंतर फेडररने आपला अनुभव पणाला लावत सामना ४-६, ६-१, ६-२, ६-४ असा जिंकला. त्याने पहिला सेट जिंकल्यानंतर साऱ्यांच्या भुवया उंचावल्या होत्या. फेडररसारख्या खेळाडूसोबत पहिल्याच सामन्यात पहिला सेट जिंकणे हे खूप मोठी बाब होती. त्यामुळे तो साऱ्यांच्याच चर्चेचा विषय बनला. पण फेडररने त्यानंतर आपला दमदार खेळ दाखवून दिला. त्याने दुसरा सेट ६-१ असा जिंकत जोरदार पुनरागमन केले. त्या सेटमध्ये सुमितला फारसा प्रतिकार करता आला नाही. तिसऱ्या सेटमध्येही फेडररने आपला जलवा दाखवत ६-२ असा सेट खि्शात घातला आणि सामन्यात आघाडी घेतली. पण चौथ्या सेटमध्ये मात्र सुमितने फेडररला पुन्हा निकराची झुंज दिली. फेडरर सहज विजय मिळवेल असे वाटत असताना सुमितने फेडररला चांगलेच झुंजवले. पण अखेर भारताच्या सुमितला पराभवाचा सामना करावा लागला.