IND vs ENG Varun Chakravarthy 5 Wickets Haul: भारत वि इंग्लंड तिसऱ्या कसोटी सामन्यात वरूण चक्रवर्तीने एकट्यानं इंग्लिश संघाला पॅव्हेलियनमध्ये धाडले. राजकोटमधील या तिसऱ्या टी-२० सामन्यात भारताचा मिस्ट्री स्पिनर वरूण चक्रवर्तीने ५ विकेट्स घेतले आहेत. ५ विकेट्स घेत वरूणने इतिहास घडवत नवा विक्रम आपल्या नावे केला आहे. वरूणने आपल्या जादुई गोलंदाजीच्या जोरावर इंग्लंडला गुडघे टेकण्यास भाग पाडलं.
वरूणने ४ षटकांच्या स्पेलमध्ये २४ धावा देत ५ विकेट्स घेतले आहेत. त्याने भेदक गोलंदाजी करत विकेट तर घेतलेच पण धावाही दिल्या नाहीत. टी-२० आंतरराष्ट्रीय क्रिकेटमध्ये पाच विकेट घेण्याची ही त्याची दुसरी वेळ आहे. पहिल्यांदा त्याने दक्षिण आफ्रिकेविरूद्धच्या टी-२० सामन्यात भारतासाठी पहिल्यांदा पाच विकेट्स घेतले होते. भारतासाठी टी-२० क्रिकेटमध्ये दोन वेळा पाच विकेट्स घेणारा तो तिसरा भारतीय ठरला आहे. त्याच्या आधी, कुलदीप यादव आणि भुवनेश्वर कुमार यांनी टी-२० क्रिकेटमध्ये प्रत्येकी दोन वेळा पाच विकेट्स घेतल्या आहेत.
वरूणने ४ षटकांत जोस बटलर, जेमी स्मिथ, जेमी ओव्हरटन, ब्रेडन कार्स आणि जोफ्रा आर्चर यांना बाद केले. यासह वरुण चक्रवर्तीने मायदेशात खेळताना पहिल्यांदाच ५ विकेट्स घेतल्या आहेत.
टी-२० क्रिकेटमध्ये सर्वाधिक वेळेस पाच विकेट घेणारे भारतीय गोलंदाज
कुलदीप यादव – दोनदा
भुवनेश्वर कुमार- दोनदा
वरुण चक्रवर्ती – दोनदा
दीपक चहर- एकदा
युझवेंद्र चहल – एकदा
वरूण चक्रवर्तीचं कमालीच पुनरागमन
वरुण चक्रवर्तीने जुलै २०२१ मध्ये टीम इंडियासाठी टी-२० मध्ये पदार्पण केले. मात्र केवळ ६ सामन्यांनंतर तो भारतीय संघाबाहेर झाला आहे. यानंतर वरुण चक्रवर्तीने आयपीएलमध्ये आपल्या फिरकीने सर्वांनाच प्रभावित केले. त्याने आयपीएलमध्ये कोलकाता नाइट रायडर्ससाठी दमदार कामगिरी केली आणि २०२४ साली टीम इंडियामध्ये स्थान मिळवले.
गेल्या वर्षी ऑक्टोबरमध्ये बांगलादेशविरुद्धच्या टी-२० मालिकेतून त्याने आंतरराष्ट्रीय क्रिकेटमध्ये पुनरागमन केले. तेव्हापासून, त्याने १० टी-२० सामने खेळले आहेत आणि ७.४० च्या इकॉनॉमीसह २७ विकेट घेतले आहेत, ज्यामध्ये दोनदा ५ विकेट घेण्याचा पराक्रम केला आहे.
