स्थानिक क्रिकेटमध्ये विदर्भाची दमदार एन्ट्री ! मुंबई, कर्नाटकाच्या पंक्तीत मिळवलं स्थान

विदर्भाने इराणी करंडक स्पर्धेच्या अंतिम दिवशी शेष भारतावर पहिल्या डावाच्या आघाडीच्या जोरावर मात करत स्पर्धेचं विजेतेपद पटकावलं. शेष भारताने दिलेलं २८० धावांचं आव्हान विदर्भाने समर्थपणे पेललं. अखेरच्या दिवशी ५ गड्यांच्या मोबदल्यात विदर्भाने २६९ धावांपर्यंत मजल मारली होती. यानंतर दोन्ही कर्णधारांनी परस्पर संमतीने सामना थांबवण्यावर सहमती दर्शवली. या विजयासह विदर्भ आपल्या रणजी आणि इराणी करंडक स्पर्धेचं विजेतेपद कायम राखणारा तिसरा संघ ठरला आहे.