IND vs PAK Asia Cup: नाद करा पण विराटचा कुठं! खणखणीत षटकार लगावत साजरं केलं अर्धशतकं; Video झाला Viral

सहाव्या षटकाच्या पहिल्याच चेंडूवर २८ धावा करुन कर्णधार रोहित शर्मा तंबूत परतला. त्यानंतर मैदानात आलेल्या विराटने जवळजवळ उर्वरीत सर्व षटकं खेळू काढली. एका बाजूला पडझड होत असताना विराटने दुसरी बाजू संभाळून धरत डावाला आकार दिला. भारताने पॉवर प्लेमध्ये केलेली सुरुवात पाहता स्कोअर २०० हून अधिक असेल असा अंदाज व्यक्त केला जात होता. मात्र रोहित आणि राहुल बाद झाल्यानंतर वेळोवेळी पाकिस्तानी गोलंदाजांना यश मिळत राहिलं आणि भारतीय फलंदाज तंबूत परतले.

विराटने मात्र सुंदर फलंदाजी केली. एका धावेच्या जागी दोन धावा घेणे, वेगवान आणि चपळ धाव घेणे यामधून फॉर्म गवसलेला विराट दिसून आला. ३५ चेंडूंमध्ये ४७ धावांवर असताना १८ व्या षटकाच्या शेवटच्या चेंडूवर विराटने मोहम्मह हसनैनला दमदार षटकार लगावला. विराटने षटकार खेचत आपले अर्धशतक साजरे केले.

या अर्धशतकाबरोबरच टी-२० मध्ये सर्वाधिक अर्धशतके करणाऱ्या खेळाडूंच्या यादीत विराट अव्वल स्थानी पोहचला आहे. विराटचे हे ३२ वे अर्धशकतं ठरलं. रोहितच्या नावावर ३१ अर्धशतकं आहेत. तिसऱ्या स्थानी पाकिस्तानचा मोहम्मद रिझावन असून त्याच्या नावावर २७ अर्धशतकं आहेत.