Rohit Sharma taking an excellent catch of Ollie Pope : भारत आणि इंग्लंड यांच्यातील दुसरी कसोटी विशाखापट्टणम येथे खेळली जात आहे. भारत दुसऱ्या कसोटीत ड्रायव्हिंग सीटवर असल्याचे दिसत आहे. भारताने चौथ्या डावात इंग्लंडला ३९९ धावांचे लक्ष्य दिले होते. पहिल्या कसोटीत इंग्लंड संघाचा हिरो ठरलेल्या ओली पोपला दुसऱ्या कसोटीच्या दुसऱ्या डावात केवळ २३ धावा करता आल्या. अश्विनने पोपला पॅव्हेलियनमध्ये पाठवले. अश्विनच्या गोलंदाजीवर यष्टीमागे रोहित शर्माने उत्कृष्ट झेल घेतला. रोहितच्या या अप्रतिम झेलनंतर सगळेच त्याचे कौतुक करत आहेत.
रोहित शर्माने घेतला उत्कृष्ट झेल –
दुसऱ्या कसोटीच्या दुसऱ्या डावात ओली पोप पुन्हा एकदा भारताकडून विजय हिसकावण्याचा प्रयत्न करत होता. पहिल्या कसोटीप्रमाणेच दुसऱ्या कसोटीच्या दुसऱ्या डावातही तो पुन्हा एकदा आक्रमक फलंदाजी करताना दिसला. ओली पोप पुन्हा एकदा मोठी खेळी खेळेल असे दिसत होते. त्यानंतर कर्णधार रोहित शर्माने त्याचा सर्वात अनुभवी फिरकी गोलंदाज आर अश्विनकडे चेंडू सोपवला. यानंतर इंग्लंडच्या डावातील २८व्या षटकात आलेल्या अश्विनचा पहिलाच चेंडू ऑली पोपच्या बॅटच्या बाहेरच्या काठावर आदळला आणि चेंडू वेगाने स्लिपकडे गेला. त्यानंतर रोहित शर्माने ऑली पोपचा शानदार झेल घेत त्याला पॅव्हेलियनमध्ये पाठवले. रोहितने जेव्हा हा झेल घेतला तेव्हा ओली पोपचाही यावर विश्वास बसत नव्हता.
दुसऱ्या कसोटीत भारतीय संघ मजबूत स्थितीत –
दुसऱ्या कसोटीत भारतीय युवा फलंदाजांनी अप्रतिम कामगिरी केली. पहिल्या डावात यशस्वी जैस्वालच्या उत्कृष्ट द्विशतकानंतर, शुबमन गिलने दुसऱ्या डावात शतक झळकावले. गिलचे हे शतक १२ डावांनंतर आले. तसेच गिलचे तिसऱ्या क्रमांकावर आलेले हे पहिले शतक होते. ज्याच्या मदतीने भारताने दुसऱ्या डावात इंग्लंडला ३९९ धावांचे मोठे लक्ष्य दिले. तत्पूर्वी, नाणेफेक जिंकून प्रथम फलंदाजी करताना भारताने ३९६ धावा केल्या होत्या. याला प्रत्युत्तर देताना इंग्लंडला केवळ २५३ धावा करता आल्या. गिलच्या शतकाच्या जोरावर भारताने दुसऱ्या डावात २५५ धावा केल्या होत्या.
उपाहारापर्यंत इंग्लंडने सहा विकेट गमावल्या –
इंग्लंडने १ बाद ६७ धावसंख्येवरुन पुढे खेळताना चौथ्या दिवशी १९४ धावांवर सहा विकेट गमावल्या आहेत. सहावी विकेट पडताच अंपायरने लंचची घोषणा केली. इंग्लिश संघाला विजयासाठी अजून २०५ धावांची गरज आहे. भारतीय संघाने या सामन्यात आपली पकड मजबूत केली आहे. मात्र, बेन स्टोक्स आणि बेन फोक्स अजूनही क्रीजवर आहेत.
