Vinesh Phogat Case Update: पॅरिस ऑलिम्पिक २०२४ मधील विनेश फोगटच्या प्रकरणाबाबत मोठी अपडेट समोर आली आहे. विनेश फोगटला अतिरिक्त वजनामुळे पॅरिस ऑलिम्पिकच्या ५० किलो वजनी गटातील अंतिम सामन्यात खेळण्यापूर्वीच अपात्र ठरवले होते. याप्रकरणी तिने आंतरराष्ट्रीय क्रीडा लवादामध्ये धाव घेत तिला संयुक्त रौप्यपदक मिळावं अशी मागणी केली. याबाबत समोर आलेल्या नव्या अपडेटनुसार विनेश फोगटच्या पदकाबाबत आजही निर्णय घेतला जाणार नाही. आंतरराष्ट्रीय क्रीडा कोर्टाने यासंदर्भात एक निवेदन जारी केले आहे. या निवेदनांतर्गत विनेश फोगट प्रकरणावर कधी निर्णय होणार याची माहिती देण्यात आली आहे.
हेही वाचा – Paris Olympic 2024 Live, Day 14: मनू भाकेर आणि पीआर श्रीजेश ऑलिम्पिक समारोप समारंभात भारताचे ध्वजवाहक
भारतीय महिला कुस्तीपटू विनेश फोगट कुस्तीच्या ५० किलो वजनी गटाच्या अंतिम सामन्यासाठी पात्र ठरली होती, परंतु अंतिम सामन्यापूर्वीच तिचे वजन १०० ग्रॅम जास्त असल्याचे आढळून आले, त्यानंतर तिला स्पर्धेसाठी अपात्र घोषित करण्यात आले. या निर्णयाविरोधात विनेश फोगटने याचिका दाखल केली आहे. आंतरराष्ट्रीय क्रीडा कोर्टात विनेशचे अपील स्वीकारण्यात आले. तेव्हापासून भारतीय कुस्तीपटूच्या ऑलिम्पिकमध्ये रौप्य पदक मिळवण्याच्या आशा वाढल्या आहेत.
Vinesh Phogatच्या याचिकेबाबत कधी होणार सुनावणी? क्रीडा कोर्टाने दिलं उत्तर
CAS ने शुक्रवारी एक निवेदन जारी केले. निवेदनात म्हटले आहे की ‘भारतीय कुस्तीपटू विनेश फोगटने सीईएसटीवरील सीएएस आणि हॉक विभागात अर्ज दाखल केला होता. या अर्जात तिने ऑलिम्पिक स्पर्धेतील महिलांच्या फ्रीस्टाइल ५० किलो वजनी गटाच्या अंतिम सामन्यापूर्वी तिच्याविरुद्ध घेतलेल्या निर्णयावर सुनावणी घेण्याची मागणी केली होती. वजन कमी करण्यात अयशस्वी झाल्यामुळे विनेश फोगटला युनायटेड वर्ल्ड रेसलिंग (UWW) चॅम्पियनशिपकडून अपात्र घोषित करण्यात आले.
विनेश फोगटने या निर्णयाला आव्हान देत हा निर्णय रद्द करावा आणि अंतिम सामन्यापूर्वी तिचे वजन पुन्हा मोजावे, जेणेकरून ती अंतिम सामन्यासाठी आपली पात्रता सिद्ध करू शकेल, अशी मागणी केली होती. सीएएस आणि हॉक विभागाची प्रक्रिया वेगवान आहे, परंतु तासाभरात या याचिकेवर निर्णय देणे शक्य नव्हते. या प्रकरणी UWW चेही म्हणणे ऐकावे लागणार आहे. या प्रकरणाची प्रक्रिया सुरू आहे. अर्जदाराच्या वतीने संयुक्त (रौप्य) पदक प्रदान करण्याची विनंती करण्यात आली आहे.
सीएएसच्या या निवेदनात असे म्हटले आहे की, विनेश आणि यूडब्ल्यूडब्ल्यू या दोघांच्या सुनावणीसाठी नियुक्ती करण्यात आली आहे. पॅरिस ऑलिम्पिक संपण्यापूर्वी याबाबत निर्णय दिला जाणार आहे. निवेदनात म्हटले आहे की हे प्रकरण डॉ ॲनाबेले बेनेट एसी एससी (AUS) यांच्याकडे पाठवण्यात आले आहे. या दोन्ही पक्षांचं म्हणणं ऐकून ऑलिम्पिक स्पर्धा संपण्यापूर्वी निर्णय घेतला जाणार आहे.
अंतिम सामन्यापूर्वी विनेशचे वजन केवळ १०० ग्रॅमने जास्त असल्याचे आढळल्याने तिला स्पर्धेतून अपात्र ठरवण्यात आले. त्यामुळे विनेश फोगटची सुवर्ण, रौप्य किंवा कांस्यपदक जिंकण्याची संधी गेली. कारण, अपात्र ठरलेले खेळाडू सहसा पदकांसाठीही अपात्र मानले जातात.
© IE Online Media Services (P) Ltd
