India vs South Africa 1st Test Match Updates : सेंच्युरियनमध्ये भारताने दक्षिण आफ्रिकेविरुद्धच्या दोन कसोटी सामन्यांच्या मालिकेतील पहिला सामना एक डाव आणि ३२ धावांनी गमावला. त्यामुळे टीम इंडियाचे दक्षिण आफ्रिकेत कसोटी मालिका जिंकण्याचे स्वप्न पुन्हा एकदा भंगले. दरम्यान विराट कोहलीने २०२३ साली एक असा विक्रम आपल्या नावावर केला आहे, जो १४६ वर्षांच्या क्रिकेट इतिहासात आतापर्यंत कोणत्याही फलंदाजाने केला नाही. सर्वाधिक शतके आणि सर्वाधिक धावा करणारा महान खेळाडू सचिन तेंडुलकरही आपल्या कारकिर्दीत असा विक्रम करू शकला नाही.
विराट कोहलीने रचला इतिहास –
खरंतर, विराट कोहलीने २०२३ सालची शेवटची इनिंग दक्षिण आफ्रिकेविरुद्ध सेंच्युरियन येथे झालेल्या कसोटी सामन्यात खेळली होती. या डावात कोहलीने ७६ धावा केल्या आणि या धावांसह विराट कोहली २०२३ मध्ये २००० हून अधिक धावा करणारा खेळाडू ठरला. यामध्ये तिन्ही फॉरमॅटच्या धावांचा समावेश आहे. विराट कोहलीने यावर्षी एकूण २०४८ धावा केल्या आहेत. २०२३ मध्ये २००० हून अधिक धावा केल्यानंतर, विराट कोहली सात कॅलेंडर वर्षांत २००० किंवा त्याहून अधिक धावा करणारा जगातील पहिला फलंदाज बनला आहे. या अगोदर हा विक्रम सहावेळा २०००हून अधिक धावा करणाऱ्या कुमार संगकाराच्या नावावर आहे.
सातव्यांदा दोन हजारांपेक्षा जास्त धावा केल्या –
विराट कोहलीने २०१२ मध्ये पहिल्यांदा २००० हून अधिक धावा केल्या होत्या. त्यानंतर २०१६ ते २०१९ अशी सलग चार वर्षे विराट कोहलीने २००० हून अधिक धावा करण्याचा विक्रम केला. मात्र, २०१९ नंतर विराट कोहलीची बॅट शांत झाली आणि त्यानंतर पुढील तीन वर्षे विराट कोहलीच्या बॅटने तशी कामगिरी केली नाही, ज्यासाठी तो ओळखला जातो. या काळात विराट कोहलीच्या बॅटमधून एकही शतक झळकले नाही, पण २०२२ मध्ये झालेल्या आशिया चषकादरम्यान विराट कोहलीने अफगाणिस्तानविरुद्ध शतकाचा दुष्काळ संपवला आणि आपल्या टी-२० कारकिर्दीतील पहिले शतकही झळकावले.
हेही वाचा – IND vs SA 1st Test : भारताचं आफ्रिकेत पहिल्यांदा मालिका विजयाचं स्वप्न भंगलं
त्यानंतर विराट कोहलीची बॅट थांबली नाही आणि २०२३ मध्ये कोहलीने आयपीएलपासून वर्ल्ड कपपर्यंत प्रत्येक प्रकारच्या स्पर्धेत धावा केल्या. २०२३ च्या विश्वचषक स्पर्धेतही विराट कोहलीने सर्वाधिक ७६५ धावा केल्या आणि एकाच विश्वचषकात सर्वाधिक धावा करण्याचा विक्रमही केला.
कोहलीने कोणत्या वर्षात २००० पेक्षा जास्त धावा केल्या आहेत, ते जाणून घेऊया.
१. २०१२ मध्ये २१८६ धावा केल्या
२. २०१४ मध्ये २२८६ धावा केल्या
३. २०१६ मध्ये २५९५ धावा केल्या
४. २०१७ मध्ये २८१८ धावा केल्या
५. २०१८ मध्ये २७३५ धावा केल्या
६. २०१९ मध्ये २४५५ धावा केल्या
७. २०२३ मध्ये २०४८ धावा केल्या
