Video : हॉटेल कर्मचाऱ्यांनी रुमचे व्हिडीओ शुटिंग केल्याने विराट संतापला; ‘खासगी आयुष्य जपा’ म्हणत व्यक्त केली नाराजी

विराट कोहलीने इन्स्टाग्रामवर एक व्हिडीओ शेअर केला आहे. हा व्हिडीओ विराट कोहली राहात असलेल्या हॉटेलमधील खोलीचा असून यामध्ये विराटचे बूट, चष्मा, कपडे दिसत आहेत. याच कारणामुळे विराटने जाहीर नाराजी व्यक्त केली आहे. ‘आपल्या आवडत्या खेळाडूला पाहण्यासाठी तसेच त्याला भेटण्यासाठी चाहते आतूर असतात, याची मला कल्पना आहे. याबाबत काहीही गैर नाही. मात्र हा व्हिडीओ पाहून मी नाराज झालो असून माझ्या खासगी आयुष्याबाबत मी चिंतीत आहे. माझ्या स्वत:च्या खोलीमध्येही माझा खासगीपणा अबाधित नसेल, तर मग मी खासगी जागेची अपेक्षा कुठे करावी? कोणाच्याही खासगी जीवनात हस्तक्षेप करणे चुकीचे असून मला हे मान्य नाही,’ असे म्हणत विराटने आपली नाराजी व्यक्त केली आहे. तसेच लोकांच्या खासगी आयुष्याचा आदर करा. त्यांच्या खासगी जीवनाचा मनोरंजनासाठी वापर करू नका, असे आवाहनही त्याने केले आहे.

दरम्यान, विराट कोहलीने व्हिडीओ पोस्ट करत नाराजी व्यक्त केल्यानंतर विराटची पत्नी अनुष्का शर्मासह जगभरातील क्रिकेटपटू तसेच अभिनेता-अभिनेत्र्यांनी प्रतिक्रिया दिली आहे. कोणाच्याही खासगी जीवनात अशा प्रकारे हस्तक्षेप करणे चुकीचे असल्याचे मत त्यांनी व्यक्त केले आहे. तसेच विराट कोहलीच्या या भूमिकेचेही सर्वांनीच समर्थन केले आहे.