Virat Kohli scored his 49th ODI century against South Africa: ईडन गार्डन्सवर दक्षिण आफ्रिकेविरुद्धच्या विश्वचषकाच्या सामन्यात विराट कोहलीची बॅट पुन्हा एकदा तळपली. विराटने या विश्वचषकातील पाचवे अर्धशतक पूर्ण केले आहे, मात्र आता चाहते शतकाची वाट पाहत आहेत. दरम्यान, विराट कोहलीने शतकासह एक मैलाचा दगड आपल्या नावावर केला आहे. खरंतर विराटने वनडे वर्ल्ड कपमध्ये १५०० धावा पूर्ण केल्या आहेत. तसेच त्याने कुमार संगकाराला मागे टाकले आहे. त्याचबरोबर सचिन तेंडुलकरच्या ४९ वनडे शतकांची बरोबरी केली.
विराट कोहलीने कुमार संगकाराला टाकले मागे –
विराट कोहली आता एकदिवसीय विश्वचषकाच्या इतिहासात सर्वाधिक धावा करणारा तिसरा खेळाडू बनला आहे. आता त्याच्या पुढे सचिन तेंडुलकर (४५ सामन्यांत २२७८ धावा) आणि ऑस्ट्रेलियाचा माजी कर्णधार रिकी पाँटिंग (४६ सामन्यांत १७४३ धावा) आहेत. विराट कोहली अजूनही सचिन तेंडुलकरपासून ५०० धावा दूर आहे. बर्थडे बॉय विराट कोहलीने कुमार संगकाराला (३७ सामन्यांत १५३२ धावा) मागे टाकले आहे.
घरच्या मैदानावर खेळताना विराटने पूर्ण केल्या ६ हजार धावा –
याशिवाय विराट कोहलीने एकदिवसीय फॉर्मेटमध्ये भारतात खेळताना ६ हजार धावा पूर्ण केल्या आहेत. ही कामगिरी करणारा तो दुसरा भारतीय फलंदाज ठरला आहे. त्याच्या पुढे सचिन तेंडुलकर असून त्याच्या नावावर ६९७४ धावा आहेत. विराटने भारतात खेळताना ११९व्या डावात ६ हजार धावा पूर्ण केल्या आहेत, तर सचिनने १६० डावात ४८.११च्या सरासरीने ६९७४ धावा केल्या होत्या. तसेच, चालू विश्वचषक २०२३ स्पर्धेत भारतासाठी सर्वाधिक धावा करणाऱ्या खेळाडूंच्या यादीत कोहलीने रोहित शर्माला मागे टाकले आहे. विराट कोहली ५०० च्या क्लबमध्ये सामील झाला आहे. त्याच्या पुढे न्यूझीलंडचा रचिन रवींद्र आणि क्विंटन डी कॉक आहेत.
हेही वाचा – IND vs SA: ‘बर्थडे बॉय’ विराट कोहली ठरला शतकाधीश! ४९व्या वनडे शतकासह सचिनच्या विक्रमाशी केली बरोबरी
विराट कोहलीची ४९वी शतकी खेळी –
विराट कोहली आपल्या ४९व्या शतकी खेळी खेळून नाबाद तंबूत परतला. त्याने १२१ चेंडूत १० चौकारांच्या मदतीने १०१ धावा केल्या. स्ट्राइक रेट ८३.४७ होता. टीम इंडियाने ५० षटकात ५ विकेट गमावत ३२६ धावा केल्या. विराट कोहलीने २०२३ च्या विश्वचषक स्पर्धेत आतापर्यंत १०८.६० च्या सरासरीने ५४३ धावा केल्या आहेत. त्याने ४ अर्धशतके आणि २ शतके झळकावली आहेत.
वाढदिवशी वनडेत शतक झळकावणारा विराट सातवा फलंदाज ठरला –
या विश्वचषकात आतापर्यंत विराटने नाबाद १०१, ८५ धावा, नाबाद ५५, १६ धावा, नाबाद १०३, ९५ धावा, शून्य आणि ८८ धावा अशा खेळी केल्या आहेत. आज शतक झळकावत विराट कोहली एकदिवसीय क्रिकेटमध्ये त्याच्या वाढदिवशी शतक ठोकणारा सातवा खेळाडू ठरला आहे. टॉम लॅथम, रॉस टेलर, सनथ जयसूर्या, मिचेल मार्श, सचिन तेंडुलकर आणि विनोद कांबळी यांनी यापूर्वी ही कामगिरी केली आहे.
वाढदिवशी वनडेत शतक झळकावणारे फलंदाज –
टॉम लॅथम -१४०* विरुद्ध नेदरलँड्स ०२/०४/२०२२
रॉस टेलर -१३१* विरुद्ध पाकिस्तान ०८/०३/२०१११
सनथ जयसूर्या -१३० विरुद्ध बांगलादेश ३०/०६/२००८
मिचेल मार्श -१२१ विरुद्ध पाकिस्तान २०/१०/२०२३
सचिन तेंडुलकर -१३४ विरुद्ध ऑस्ट्रेलिया २४/०४/१९९८
विनोद कांबळी -१००* विरुद्ध इंग्लंड १८/०१/१९९३
विराट कोहली – १०१* विरुद्ध दक्षिण आफ्रिका ०५/११/ २०२३
