विराट कोहलीने टी-२० विश्वचषकात चमकदार कामगिरी केली होती. त्याने ४ अर्धशतकांच्या मदतीने सर्वाधिक २९६ धावा केल्या. मात्र, टीम इंडियाचा प्रवास वर्ल्डकपमधील शेवटच्या-४ मध्ये संपला. उपांत्य फेरीत इंग्लंडने त्याचा १० विकेट्सने पराभव केला होता. यानंतर इंग्लिश संघानेही अंतिम फेरीत पाकिस्तानचा पराभव करत विजेतेपदावर कब्जा केला. भारतीय संघ सध्या न्यूझीलंड दौऱ्यावर आहे . दरम्यान, कोहलीचा पाकिस्तानमध्ये खरेदी करतानाचा १६ वर्ष जुना व्हिडिओ व्हायरल होत आहे. व्हिडिओमध्ये त्याच्यासोबत अनेक जुने दिग्गजही दिसत आहेत.
२००६ मध्ये पीयूष चावलाच्या नेतृत्वाखाली १९ वर्षाखालील भारतीय संघ पाकिस्तानच्या दौऱ्यावर गेला होता. त्यानंतर संघाने २ सामन्यांची कसोटी मालिका २-० अशी जिंकली तर ४ सामन्यांची एकदिवसीय मालिका ४-० अशी जिंकली. व्हिडिओमध्ये विराट कोहलीसोबत रॉबिन उथप्पा, चेतेश्वर पुजारा, रवींद्र जडेजा आणि इशांत शर्मा यांच्यासह अनेक दिग्गज खेळाडू दिसत आहेत. कोहलीने कसोटी मालिकेतील ३ डावात १७२ धावा तर एकदिवसीय सामन्याच्या ३ डावात १२५ धावा केल्या होत्या.
वरिष्ठ संघासोबत तो पाकिस्तानला कधीही जाऊ शकला नाही –
भारतीय वरिष्ठ संघाने २००८ मध्ये शेवटचा पाकिस्तान दौरा केला होता. तोपर्यंत कोहलीने आंतरराष्ट्रीय क्रिकेटमध्ये पदार्पण केले नव्हते. सीनियर संघासोबत तो पाकिस्तानला कधीही जाऊ शकला नाही. अलीकडेच कोहलीने टी-२० विश्वचषकात पाकिस्तानविरुद्ध नाबाद ८२ धावांची उत्कृष्ट खेळी खेळली होती. यामुळे संघाला रोमांचक विजय मिळाला. अखेरच्या ८ चेंडूत संघाला २८ धावा करायच्या होत्या. त्याने १९व्या षटकात हरिस रौफला सलग दोन षटकार ठोकले. त्यानंतर २०व्या षटकात मोहम्मद नवाजला षटकार लगावला होता.
हेही वाचा – FIFA World Cup 2022: सेनेगलला बसला मोठा धक्का; आणखी एक स्टार खेळाडू वर्ल्ड कपमधून बाहेर
पाकिस्तान संघाने शेवटचा भारत दौरा २०१२-१३ मध्ये केला होता. त्यानंतर दोन्ही संघांमध्ये ३ सामन्यांची एकदिवसीय मालिका आणि २ सामन्यांची टी-२० मालिका खेळवण्यात आली. तेव्हापासून या दोघांमध्ये कोणतीही द्विपक्षीय मालिका झालेली नाही. ते फक्त आयसीसी किंवा मोठ्या टूर्नामेंटमध्ये एकमेकांविरुद्ध खेळतात.
