फलंदाजांच्या क्रमवारीत कोहली अग्रस्थानावर

ऑस्ट्रेलियाविरुद्धच्या एकदिवसीय मालिकेत एकूण ३४४ धावा करणाऱ्या विराट कोहलीने जागतिक एकदिवसीय क्रिकेट क्रमवारीतील फलंदाजांच्या विभागात अग्रस्थानावर झेप घेतली आहे. कोहलीने पुण्यात ६१, जयपूरला नाबाद १००, मोहालीत ६८, नागपूरमध्ये नाबाद ११५ आणि बंगळुरूला ० धावा काढल्या. २४ वर्षीय कोलीने ११४.६६च्या सरासरीने धावा काढून ३८ गुण मिळवत क्रमवारीत आघाडीचे स्थान मिळवले आहे. कोहलीने  प्रथमच ही मजल मारली आहे. सचिन तेंडुलकर आणि महेंद्रसिंग धोनीनंतर कोहली हा जागतिक फलंदाजीच्या क्रमवारीत प्रथम स्थान मिळवणारा तिसरा खेळाडू ठरला.