IND vs BAN Virat Kohli Dismissed by Net Bowler: भारत वि बांगलादेशमधील दुसरा कसोटी सामना २७ सप्टेंबर म्हणजेच आजपासून खेळवला जाणार आहे. पण पावसामुळे सामन्याची नाणेफेक उशिरा होणार आहे. सामन्यापूर्वीच्या आदल्या दिवशी मैदानात सराव करतानाचा विराट कोहलीचा एक किस्सा समोर आला. विराट कोहली कानपूरमध्ये सराव करत असताना नेट बॉलरने त्याला दोन वेळा बाद केले आणि त्याच्यासमोर विराट फार काळ टिकू शकला नाही.
भारतीय संघाने बांगलादेशविरुद्धचा पहिला कसोटी सामना 280 धावांनी जिंकला. युवा फलंदाज शुबमन गिल आणि युवा यष्टीरक्षक फलंदाज ऋषभ पंत यांनी संघाकडून शतकी खेळी खेळली. मात्र, स्टार फलंदाज विराट कोहलीची बॅट शांत राहिली. चेन्नईपाठोपाठ कोहली कानपूरमध्ये नेट प्रॅक्टिसदरम्यान संघर्ष करताना दिसला.
विराट कोहलीने अक्षर पटेल आणि जसप्रीत बुमराह यांचा नेटमध्ये सामना केला, तेव्हाही तो धावा करण्यासाठी खूप धडपडत होता. इतकंच नाही तर नेट बॉलर जमशेद आलमच्या चेंडूवर कोहलीॉ अडचणीत सापडला होता. लखनौच्या या खेळाडूने कोहलीला दोनदा बाद केले. आलमच्या गोलंदाजीवर कोहली प्रभावित झालेला दिसला. जमशेद आलम विराटला १३० च्या वेगाने गोलंदाजी करत होता आणि विराट यापैकी ४ षटकांत २ वेळा बाद झाला. या सरावानंतर जमशेदने माध्यमांशी बोलताना किस्सा सांगितला.
जमशेद आलम विराटबाबत सांगताना NDTV ला सांगताना म्हणाला, “मी विराट कोहलीला २४ चेंडू टाकले. १३५ च्या वेगाने गोलंदाजी करताना मी त्याला दोन वेळा बाद केलं. सरावाची खेळपट्टी ही वेगवान गोलंदाजांना मदत करणारी होती, तर कानपूरची खेळपट्टी सहसा फिरकीसाठी अनुकूल असते. तितक्यात माझी गोलंदाजी पाहून विराट कोहली म्हणाला, चांगली गोलंदाजी केलीस रे, किती वर्षाचा आहे, मी त्याला म्हटलं, २२ वर्षांचा आहे. यावर विराटने उत्तर दिलं, मेहनत करत राहा. विराट कोहलीला बाद केल्यानंतर मला जग जिंकल्यासारखं वाटलं.” जमशेद आलमने संयमी वेगवान गोलंदाजी करत विराटला बाद केले. जमशेद आलमने दोनदा आउट-स्विंगिंग चेंडू टाकून विराटची विकेट घेण्यात यश मिळविले.
आता जे नेटमध्ये दिसले ते बांगलादेशविरुद्ध कानपूर कसोटीतही पाहायला मिळाले तर विराट कोहलीकडून मोठ्या खेळीची आशा सोडून द्या. असो, त्याने कानपूरमध्ये याआधी कुठे काही विशेष केले आहे? 2016 मध्ये, तो कानपूरमध्ये न्यूझीलंडविरुद्ध एकमेव कसोटी खेळला. ज्यामध्ये त्याने पहिल्या डावात 9 धावा आणि दुसऱ्या डावात 18 धावा म्हणजे एकूण 27 धावा केल्या. आणि, नेट बॉलर जमशेद आलमने ज्या प्रकारे त्याचा पर्दाफाश केला आहे, त्यावरून बांगलादेशविरुद्धही विराटच्या चांगल्या कामगिरीबद्दल काहीही सांगता येणार नाही.
विराटला बाद करणाऱ्या नेट बॉलरने सांगितले की, त्यानेही चेंडू रोहित शर्माकडे टाकला पण तो त्याची विकेट घेण्यात अपयशी ठरला. त्याने असेही सांगितले की त्याच्याशिवाय बुमराह आणि सिराजने देखील नेटमध्ये विराट कोहलीला चेंडू टाकला, ज्यामध्ये बुमराहने त्याला एकदा बाद केले. म्हणजे एकूण विराट कोहली नेट प्रॅक्टिस दरम्यान ३ वेळा बाद झाला.
