बोल्टच सम्राट!

लंडन ऑलिम्पिकनंतर जवळपास एक वर्षांने जमैकाच्या युसेन बोल्टचा वेगवान अविष्कार विश्व अजिंक्यपद अ‍ॅथलेटिक्स स्पर्धेत पाहायला मिळाला. चित्त्याच्या वेगाने धाव घेत बोल्टने लुझनिकी स्टेडियमवरील सर्वानाच अचंबित केले. बोल्टने १०० मीटरचे अंतर ९.७७ सेकंदांत पार करत आपणच वेगाचा सम्राट असल्याचे सिद्ध केले.
जमैका पॉवेल, टायसन गे हे अव्वल खेळाडू उत्तेजक चाचणीत दोषी आढळल्यानंतर यंदाची विश्वविजेतेपदाची लढत बोल्ट, अमेरिकेचा जस्टिन गॅटलिन आणि जमैकाचा नेस्टा कार्टर यांच्यातच होती. उपांत्य फेरीत धीम्या गतीने सुरुवात करणाऱ्या बोल्टने अंतिम फेरीत मात्र कोणतीही चूक केली नाही. त्याने २००४च्या अ‍ॅथेन्स ऑलिम्पिकमधील सुवर्णपदक विजेता गॅटलिन आणि त्याचा सहकारी कार्टर यांना लिलया मागे टाकत सुवर्णपदकावर मोहोर उमटवली.