Kapil Dev emotional message for Anshuman Gaekwad battling cancer : भारताचा माजी क्रिकेटपटू अंशुमन गायकवाड सध्या ब्लड कॅन्सरशी झुंज देत आहेत. अंशुमन गायकवाड यांच्यावर लंडनच्या रुग्णालयात उपचार सुरू आहेत. दरम्यान, १९८३ चा विश्वचषक विजेता कर्णधार कपिल देव यांनी एक व्हिडिओ जारी केला आहे. ज्यामध्ये त्यांनी आपल्या माजी सहकाऱ्याबद्दल मन जिंकणाऱ्या गोष्टी सांगितल्या आहेत. कपिल देव यांचा हा व्हिडीओ सोशल मीडियावर तुफान व्हायरल होत असून चाहते त्यांचे कौतुक करत आहेत.
बीसीसीआयने केली एक कोटीची मदत –
माजी क्रिकेपटू अंशुमन गायकवाड यांना सर्वतोपरी मदत करू, असे आश्वासन कपिल देव यांनी दिले आहे. कपिल देव यांच्याशिवाय संदीप पाटील यांच्यासह अनेक माजी क्रिकेटपटूही गायकवाड यांना मदत करण्यासाठी कार्यरत आहेत. या कठीण काळात त्यांनी भारतीय क्रिकेट नियामक मंडळाला (बीसीसीआय) मदत करण्यास सांगितले होते. या दोन क्रिकेटपटूंच्या विनंतीनंतर बीसीसीआयने एक कोटी रुपये देण्याचा निर्णय घेतला होता.
कपिल देव यांनी शेअर केला व्हिडिओ –
कपिल देव यांनी एक व्हिडीओ शेअर करत अंशुमन गायकवाड यांच्याबद्दल काही गोष्टी सांगितल्या आहेत. कपिल देव म्हणाले, “हाय अंशू, मला माहित आहे की तू कठीण काळातून जात आहेस. आपण सर्वजण आयुष्यातील कठीण काळातून गेलो आहोत. मला सर्व चांगले दिवस आठवतात. पहिल्यांदा जेव्हा मी तुझ्यासोबत खेळलो, तेव्हा तू माझा कर्णधार होतास.”
हेही वाचा – IND vs SL : ‘मला नाही वाटत ड्रेसिंगरुमध्ये दोघात…’, विराट-गौतमबद्दल आशिष नेहराचं मोठं वक्तव्य
कपिल देव पुढे म्हणाला, “मला आठवते मी कर्णधार असताना तू पाकिस्तानविरुद्ध दोनशे धावा केल्या होत्या. या खूप छान आठवणी आहेत. कठीण प्रसंग येतात आणि जातात पण मला माहीत आहे की तू एक लढवय्या आहेस. आनंदी राहा आणि जीवन जगण्याचा प्रयत्न करत रहा. देवाने तुला जे काही दिले आहे आणि मी प्रार्थन करतो की तू पहिल्यापेक्षा चांगला व्हावा आणि आनंदी रहावा.”
कपिल देव यांनी व्यक्त केली मदतीची अपेक्षा –
माजी विश्वचषक विजेत्या कर्णधाराने पुढे सांगितले की, “आपल्या सर्वांना एक दिवस जायचे आहे, परंतु मानवतेची सर्वात चांगली गोष्ट ही आहे की आपण क्रिकेटच्या मैदानावर ज्या प्रकारे लढतो. त्याचप्रमाणे जे व्हायचे ते होईल, पण आपण लढत राहिले पाहिजे. मला आशा आहे की आम्ही लवकरच भेटू.” कपिल देव म्हणाले की, आम्ही आमच्या सहकारी खेळाडूंना शक्य ती सर्व मदत केली पाहिजे.”
© IE Online Media Services (P) Ltd
