PAK vs WI: वेस्ट इंडिजचा पाकिस्तानवर ३५ वर्षांनी ऐतिहासिक कसोटी विजय, यजमान स्वत:च्याच जाळ्यात अडकले; सामन्यात नेमकं काय घडलं?

दुसऱ्या कसोटी सामन्यात पाकिस्तान संघ तीन फिरकी गोलंदाजांसह मैदानात उतरला होता आणि आपल्या फिरकी गोलंदाजांच्या जोरावर हा सामना जिंकेल असे वाटले होते, पण तसं होऊ शकलं नाही आणि वेस्ट इंडिजने विजय मिळवला. या सामन्यातील पाकिस्तानची ही रणनीती त्यांनाच महागात पडली. जोमेल वॅरिकनला दुसऱ्या सामन्यासाठी सामनावीर म्हणून गौरवण्यात आले तर मालिकेतील सर्वोत्तम खेळाडू म्हणूनही त्यालाच पुरस्कार मिळाला. वेस्ट इंडिज संघाने ३५ वर्षांनंतर पाकिस्तानमध्ये कसोटी सामन्यात पाकिस्तानचा पराभव केला. वेस्ट इंडिजचा पाकिस्तानमध्ये शेवटचा कसोटी विजय १९९० मध्ये होता.

मुलतानमध्ये दुसरी कसोटी जिंकण्यासाठी वेस्ट इंडिजने पाकिस्तानसमोर २५४ धावांचे लक्ष्य ठेवले होते. पण, स्वत:च्या मैदानावरही पाकिस्तानी संघ कॅरेबियन गोलंदाजांसमोर अपयशी ठरला. पाकिस्तान संघाची अवस्था इतकी वाईट होती की लक्ष्याचा पाठलाग करताना त्यांना २०० धावाही करता आल्या नाहीत. २५४ धावांच्या लक्ष्याचा पाठलाग करताना पाकिस्तानचा दुसरा डाव केवळ १३३ धावांवर आटोपला.

दुसऱ्या कसोटीत वेस्ट इंडिजने नाणेफेक जिंकून प्रथम फलंदाजी करण्याचा निर्णय घेतला. पण संघ मोठी धावसंख्या उभारण्यात अपयशी ठरला. वेस्ट इंडिजचा पहिला डाव केवळ १६३ धावांवर आटोपला. प्रत्युत्तरात पाकिस्तानचा पहिला डावही स्वस्तात आटोपला. पाकिस्तान केवळ १५४ धावा करू शकला. पहिल्या डावात ९ धावांची आघाडी घेतल्यानंतर विंडीजने दुसऱ्या डावात २४४ धावा केल्या. आणि पाकिस्तानला २५४ धावांचे लक्ष्य देण्यात यशस्वी झाला.

जोमेल वेरिकन ठरला वेस्ट इंडिजच्या ऐतिहासिक विजयाचा हिरो

वेस्ट इंडिजच्या या ऐतिहासिक विजयाचा हिरो ठरला जोमेल वेरिकन, ज्याने या सामन्यात ९ विकेट्स घेतले. त्याने पहिल्या डावात पाकिस्तानच्या ४ फलंदाजांना बाद केले, तर दुसऱ्या डावात ५ विकेट घेतले. याशिवाय खालच्या फळीत फलंदाजी करताना त्याने पहिल्या डावात खेळलेल्या ३६ धावांची महत्त्वपूर्ण नाबाद खेळी केली. वॅरिकनच्या या अप्रतिम कामगिरीमुळे त्याला सामनावीर म्हणूनही निवडण्यात आले.