आज महिला प्रीमियर लीगच्या १२व्या सामन्यात मुंबई इंडियन्सचा सामना गुजरात जायंट्सशी संपन्न झाला. हा सामना मुंबईच्या ब्रेबॉर्न स्टेडियमवर खेळला गेला. हरमनप्रीतची अर्धशतकी खेळी अन् मुंबईच्या धारदार गोलंदाजीच्या जोरावर मुंबईने सलग पाचवा विजय नोंदवला आहे. गुजरातवर ५५ धावांनी मात केली. मुंबईने आपले पाचही सामने जिंकत अव्वल स्थान कायम राखले असून त्यांचे पाच सामन्यांत दहा गुण झाले आहेत. त्याचबरोबर गुजरातचा संघ पाचपैकी एक सामना जिंकून चौथ्या स्थानावर आहे. प्लेऑफच्या शर्यतीत टिकून राहण्यासाठी गुजरातला विजय आवश्यक होता मात्र, त्यांच्या पदरी निराशा पडली. आता सर्व सामने जिंकणे आवश्यक आहेत.
नाणेफेकीचा कौल हा पुन्हा एकदा हरमनच्या विरोधात गेला. प्रथम फलंदाजी करताना मुंबईने २० षटकांत ८ गडी गमावून १६२ धावा केल्या. मात्र गुजरातला या आव्हानाचा पाठलाग करणे शक्य झाले नाही. शून्यावर गुजरातने त्यांची पहिली विकेट गमावली. या आधीच्या सामन्यात अर्धशतकी खेळणारी सोफिया डंकले अपयशी ठरली. त्यानंतर एस. मेघना आणि हरलीन देओल यांनी डाव सावरण्याचा प्रयत्न केला. परंतु मेघना १६ धावा करून बाद झाली आणि त्यानंतर गुजरात संघाला गळती लागली. एकाच षटकात मेघना सोबत अ‍ॅनाबेल सदरलँड भोपळाही न फोडता बाद झाली. ऍशले गार्डनर देखील फार काही करू शकली नाही. ती ८ धावा करून बाद झाली. कर्णधार स्नेह राणा हिने २० धावा केल्या. सुषमा वर्मा हिने १७ धावांचे योगदान दिले. त्यांच्याव्यतिरिक्त एकाही फलंदाजाला दोन आकडी धावसंख्या करता आली नाही.
ठराविक अंतरावर विकेट्स पडत गेल्याने गुजरातचा डाव अखेर ९ बाद १०७ धावांवर संपुष्टात आली. मुंबईकडून हेली मॅथ्यूज आणि नॅट सिव्हर ब्रंट यांनी सर्वाधिक ३ विकेट्स घेतल्या. ब्रंटने ४ षटके गोलंदाजी करताना २१ धावा खर्च करत ३ विकेट्स नावावर केल्या. तसेच, मॅथ्यूजने ४ षटके गोलंदाजी करताना २३ धावा खर्च करत ३ विकेट्स घेतल्या. तर अमेलिया केरने २ विकेट्स आणि इस्सी वोंगने १ विकेट घेत त्यांना साथ दिली.
तत्पूर्वी प्रथम फलंदाजी करताना मुंबईची सुरुवात चांगली झाली नाही. मुंबई इंडियन्स संघाकडून कर्णधार हरमनप्रीत कौर हिने सर्वाधिक धावा केल्या. तिने ३० चेंडूंचा सामना करताना ५१ धावा कुटल्या. या खेळीला तिने २ षटकार आणि ७ चौकारांचा साज चढवला. इनफॉर्म फलंदाज हेली मॅथ्यूजला डावाच्या पहिल्या ओव्हरच्या चौथ्या चेंडूवर ऍशले गार्डनरने बाद केले. तिला खातेही उघडता आले नाही. यानंतर नॅट सीवर ब्रंट आणि यास्तिका भाटिया यांनी दुसऱ्या विकेटसाठी ७४ धावांची भागीदारी केली. नेट सीव्हर ३१ चेंडूंत पाच चौकार आणि एका षटकाराच्या मदतीने ३६ धावा करून बाद झाली. तिच्याव्यतिरिक्त यास्तिका भाटिया हिने ४४ धावांचे योगदान दिले.
अमेलिया केर हिने १९ धावांचे योगदान दिले. त्यांच्याव्यतिरिक्त इतर फलंदाजांना १०धावांचा आकडाही पार करता आला नाही. हुमैरा काझी (२) आणि अमनजोत कौर (०) यांना फार काही करता आले नाही. धारा गुजरने एक धाव आणि जिंतीमणी कलिता याने दोन धावा केल्यानंतर नाबाद राहिले. यावेळी गुजरातकडून गोलंदाजी करताना ऍशले गार्डनर हिने सर्वाधिक विकेट्स घेतल्या. तिने यावेळी ४ षटके गोलंदाजी करताना ३४ धावा खर्च करत सर्वाधिक ३ विकेट्स घेतल्या. तिच्याव्यतिरिक्त किम गार्थ, स्नेह राणा आणि तनुजा कंवर यांनी प्रत्येकी १ विकेट नावावर केली.
