जुलैमध्ये होणाऱ्या वेस्ट इंडिज दौऱ्यासाठी टीम इंडियाच्या कसोटी आणि एकदिवसीय संघांची घोषणा करण्यात आली आहे. यशस्वी जैस्वालचा प्रथमच या संघात समावेश करण्यात आला आहे. जैस्वालला कसोटी संघात स्थान मिळाले आहे. टीम इंडिया वेस्ट इंडिज दौऱ्यावर दोन कसोटी सामने खेळणार आहे. टीम इंडियात स्थान मिळाल्यानंतर यशस्वीच्या वडिलांची प्रतिक्रिया भावूक होती. यशस्वी जैस्वाल याने स्वतः सांगितले की, जेव्हा त्यांच्या वडिलांना हे समजले तेव्हा त्यांची पहिली प्रतिक्रिया काय होती? त्यांना अश्रू अनावर झाले होते.
संघात निवड झाल्यानंतर यशस्वीचे वडील भावूक झाले
पीटीआयशी बोलताना यशस्वी जैस्वाल म्हणाला की, “जेव्हा माझ्या वडिलांना हे कळले तेव्हा ते रडू लागले. त्यांना अश्रू अनावर झाले होते. आपला मुलगा आता भारतासाठी खेळणार याचा आंनंद त्यांना झाला होता. माझ्या कष्टाचे चीज होत आहे असे त्यांना वाटत होते. पण, मी अद्याप आईला भेटलो नाही. मी सकाळी सरावासाठी बाहेर पडलो होतो. काही वेळाने मी माझ्या आईला भेटेन.”
नुकत्याच झालेल्या वर्ल्ड टेस्ट चॅम्पियनशिप संघातही यशस्वी राखीव खेळाडू म्हणून होता. आयपीएल आणि देशांतर्गत क्रिकेटमधील त्याच्या उत्कृष्ट कामगिरीबद्दल त्याची संघात निवड झाली आहे. यशस्वी म्हणाली, “मला खूप आनंद झाला आहे आणि मी माझे सर्वोत्तम देण्याचा प्रयत्न करेन. माझे नाव संघात आहे की नाही हे कळेपर्यंत मी थोडा घाबरलो होतो.”
खूप काही शिकायचे बाकी आहे – यशस्वी जैस्वाल
यशस्वी पुढे बोलताना म्हणाला की, “खरं तर खूप काही शिकण्यासारखे आहे आणि मला आशा आहे की मी या क्षणाचा आनंद घेत राहीन. मी नेहमी स्वतःला प्रेरित करत असतो. मी माझ्या संघाला कोणत्याही परिस्थितीत सामना जिंकून देऊ शकतो असा आत्मविश्वास नेहमीच मनाशी बाळगत असतो. खरं म्हणजे माझे वडील मला नेहमी सकारात्मक विचार करण्याचा आणि स्वतःवर विश्वास ठेवण्याचा सल्ला देतात.”
तो पुढे म्हणाला, “माझी तयारी जोरात सुरू आहे आणि त्यासाठी मी सतत वरिष्ठ खेळाडूंचा सल्ला घेत आहे. मी त्याच्याकडून आत्तापर्यंत खूप काही शिकलो आहे. एकंदरीत हे तुझ्यावर अवलंबून आहे, तू कोणत्या मानसिकतेने खेळतोस. हे मला रोहित शर्मा, विराट कोहली आणि अजिंक्य रहाणे यांसारख्या खेळाडूंशी बोलताना त्यांनी मला सांगितले.”
भारत आणि वेस्ट इंडिज यांच्यातील दोन कसोटी सामन्यांच्या मालिकेतील पहिला सामना १२ ते १६ जुलै दरम्यान तर दुसरा सामना २० ते २४ जुलै दरम्यान खेळवला जाणार आहे. आयपीएल २०२३ यशस्वी जैस्वालसाठी स्वप्नवत होते. राजस्थान रॉयल्सकडून खेळताना त्याने १४ सामन्यात १६३च्या स्ट्राइक रेटने ६२५ धावा केल्या. यादरम्यान त्याने या लीगमधील पहिले शतकही झळकावले. याशिवाय यशस्वी जैस्वालनेही ५ अर्धशतके झळकावली. त्याची चमकदार कामगिरी पाहून त्याला वर्ल्ड टेस्ट चॅम्पियनशिपच्या अंतिम सामन्यात टीम इंडियामध्ये स्टँडबाय खेळाडू म्हणून समाविष्ट करण्यात आले.
