Yuvraj Singh in IPL: आयपीएल २०२५च्या मेगा लिलावापूर्वी अनेक संघांमध्ये मोठे बदल होण्याची शक्यता आहे. यादरम्यानच एक मोठी बातमी समोर येत आहे. भारताचा माजी दिग्गज युवराज सिंग (Yuvraj Singh in IPL) ६ वर्षांनंतर आयपीएलमध्ये परतणार असल्याची सध्या चर्चा आहे. यावेळी युवी आयपीएलमध्ये खेळाडू म्हणून नव्हे तर प्रशिक्षक म्हणून पुनरागमन करू शकतो. वृत्तानुसार, गुजरात टायटन्सचे प्रशिक्षक आशिष नेहरा आणि क्रिकेट संचालक विक्रम सोलंकी मेगा लिलावापूर्वी संघापासून वेगळे होण्याबाबत चर्चा सुरू आहेत. त्याचवेळी फ्रँचायझी युवराज सिंगशी संपर्क करत असल्याच्या बातम्याही समोर येत आहेत.
नेहरा आणि सोलंकी आयपीएल २०२२ मध्ये टायटन्समध्ये सामील झाले आणि फ्रँचायझीला पदार्पणाच्या हंगामात पहिले विजेतेपद जिंकण्यात महत्त्वाची भूमिका बजावली. आयपीएल २०२३ मध्ये अंतिम फेरीपर्यंत टायटन्सने चमकदार कामगिरी केली, जिथे चेन्नई सुपर किंग्जने त्यांचा पराभव केला. मात्र, २०२३ मध्ये संघात बदल करण्यात आले आणि हार्दिक मुंबई इंडियन्समध्ये गेल्यानंतर शुबमन गिलला कर्णधार बनवण्यात आले. त्याचवेळी शमीला दुखापत झाल्याने तो २०२३ चा हंगाम खेळला नाही. त्यामुळे संघाची कामगिरी विशेष झाली नाही. २०२३च्या मोसमात गुजरात गुणतालिकेत आठव्या स्थानावर होता.
युवराज सिंग आयपीएलमध्ये कोणत्या संघाचा कोच होणार?
स्पोर्ट्स 18 च्या रिपोर्टनुसार, आता मेगा लिलावापूर्वी फ्रेंचायझी मोठा निर्णय घेणार आहे. गुजरात फ्रँचायझी युवराज सिंगला संघाचा नवा प्रशिक्षक बनवण्याच्या विचारात आहे. यासाठी संघ व्यवस्थापन युवीच्या संपर्कात आहेत. यासंबंधित एका सूत्राने सांगितले की, “संघात बरेच बदल होणार आहेत. आशिष नेहरा आणि विक्रम सोलंकी संघाला अलविदा करण्याची शक्यता आहे आणि युवराज सिंगसह चर्चा करण्यास सुरूवात झाली आहे. अद्याप काहीही ठरलेले नाही, परंतु गुजरात टायटन्सच्या कोचिंग स्टाफमध्ये काही मोठे बदल होऊ शकतात.”
सध्या गुजरात टायटन्सचा कर्णधार शुभमन गिलने युवराज सिंगकडे क्रिकेटचे धडे गिरवले होते. युवराज सिंगला आयपीएलमध्ये कोचिंगचा अनुभव नाहीय. गेल्या तीन मोसमात टायटन्सचे सहाय्यक प्रशिक्षक असलेले गॅरी कर्स्टन यांनी यापूर्वीच संघापासून वेगळे झाले असून त्यांनी पाकिस्तान क्रिकेट संघाच्या मुख्य प्रशिक्षकपदाची जबाबदारी स्वीकारली आहे. टायटन्सचे इतर कोचिंग स्टाफ सदस्य – आशिष कपूर, नईम अमीन, नरेंद्र नेगी आणि मिथुन मन्हास हे देखील फ्रँचायझीपासून वेगळे होण्याची शक्यता आहे.
युवराज सिंग शेवटचा सामना आयपीएलमध्ये मुंबई इंडियन्सकडून खेळाडू म्हणून खेळला होता. त्याने ६ वर्षांपूर्वी आयपीएलमधील शेवटचा सामना CSK विरुद्ध खेळला होता. आपल्या आयपीएल कारकिर्दीत युवीने १३२ सामन्यांमध्ये २७५० धावा केल्या आहेत आणि ३६ विकेट घेण्यातही तो यशस्वी ठरला आहे. युवराज सिंग आयपीएलमध्ये पंजाब किंग्ज, पुणे वॉरियर्स, आरसीबी, दिल्ली कॅपिटल्स, सनरायझर्स हैदराबाद आणि मुंबई इंडियन्सकडून खेळला आहे.
© IE Online Media Services (P) Ltd