Zimbabwe Cricket Board suspends two players : झिम्बाब्वे क्रिकेट बोर्डाने आपल्या दोन खेळाडूंवर मोठी कारवाई केली आहे. या दोन्ही खेळाडूंनी अशा औषधांचे सेवन केले होते ज्यावर बंदी घालण्यात आली आहे. त्यानंतर हे दोन्ही खेळाडू डोप टेस्टमध्ये पॉझिटिव्ह आढळले. झिम्बाब्वेच्या या दोन खेळाडूंची नावे वेस्ली माधवेरे आणि ब्रँडन मावुता अशी आहेत. ज्यांच्या विरोधात झिम्बाब्वे क्रिकेट बोर्डाने कारवाई केली आहे.
क्रिकेट बोर्डाने आता या दोन्ही खेळाडूंना पुढील सुनावणीपर्यंत निलंबित केले आहे. दोन्ही खेळाडू डोपिंगविरोधी नियमांचे उल्लंघन केल्याप्रकरणी दोषी आढळले. त्यानंतर झिम्बाब्वे क्रिकेटने दोन्ही खेळाडूंवर तत्काळ कारवाई केली.
झिम्बाब्वे क्रिकेटने एक निवेदन जारी केले –
झिम्बाब्वे क्रिकेट बोर्डाने एक निवेदन जारी करून याबाबत माहिती दिली. झिम्बाब्वे क्रिकेट बोर्डाने आपल्या निवेदनात असे म्हटले आहे की, ‘दोन्ही खेळाडू बंदी घातलेल्या औषधांचे सेवन केल्याप्रकरणी दोषी आढळले आहेत. वेस्ली माधवेरे आणि ब्रँडन मावुता यांची डोप चाचणी पॉझिटिव्ह आहे. त्यानंतर या दोन्ही खेळाडूंना प्रकरणाची पूर्ण सुनावणी होईपर्यंत निलंबित करण्यात आले आहे. आता पुढील आदेश येईपर्यंत हे खेळाडू कोणत्याही क्रिकेट उपक्रमात सहभागी होऊ शकणार नाहीत.
हेही वाचा – IND vs SA : तिसर्‍या वनडे सामन्यातून ऋतुराज गायकवाडला का वगळलं? बीसीसीआयने सांगितले कारण
दोन्ही खेळाडूंनी झिम्बाब्वेसाठी आंतरराष्ट्रीय सामने खेळले आहेत –
या दोन्ही खेळाडूंनी झिम्बाब्वे राष्ट्रीय संघासाठी भरपूर क्रिकेट खेळले आहे. वेस्ली माधवेरेने झिम्बाब्वेसाठी ९८ आंतरराष्ट्रीय सामने खेळले आहेत. त्यापैकी ३६ एकदिवसीय आणि ६० टी-२० आंतरराष्ट्रीय सामने आहेत. माधवेरेने एकदिवसीय क्रिकेटमध्ये ७०५ आणि टी-२०मध्ये १०४७ धावा केल्या आहेत. दुसरीकडे, ब्रेंडन मावुता झिम्बाब्वेसाठी ४ कसोटी, १२ एकदिवसीय आणि १० टी-20 सामने खेळला आहे. मावुताने कसोटीत ८२ धावा, वनडेत ८८ धावा आणि ६१ धावा केल्या आहेत. आंतरराष्ट्रीय क्रिकेटमध्ये त्याच्या नावावर फक्त एक अर्धशतक आहे.
झिम्बाब्वे संघाचा वाईट काळ सुरू आहे –
झिम्बाब्वे क्रिकेट संघाचा सध्या वाईट काळ सुरू आहे. झिम्बाब्वेचा संघ २०२४ च्या टी-२० विश्वचषकासाठीही पात्र ठरू शकलेला नाही. आता झिम्बाब्वे संघ २०२४ मध्ये होणाऱ्या टी-२० विश्वचषकात खेळताना दिसणार नाही. गेल्या वर्षी या संघाने टी-२० विश्वचषकात चांगली कामगिरी केली होती. या संघाने या स्पर्धेत पाकिस्तानसारख्या संघाचाही पराभव केला होता.