‘‘वायरलेस का जमाना है..’’

वायरलेस चार्जर

मोबाइल कंपन्यांमध्ये विविध अद्ययावतीकरण होत गेले. मात्र मोबाइल सुरू राहण्यासाठी आवश्यक असणाऱ्या चार्जरमध्ये हव्या तितक्या प्रमाणात बदल झाले नाहीत. तोकडय़ा वायरींचाच आधार घेत मोबाइल चार्जिग करणे मोबाइल वापरकर्त्यांला जिकरीचे जाते. अनेकदा काही प्रतिकूल परिस्थितीत चार्जिग लावण्यासाठी सुयोग्य ठिकाणी चार्जिग केंद्र उपलब्ध होत नाही. अशा वेळेस कामाला येते ते वायरलेस चार्जर. वायरलेस चार्जरला सध्या बाजारपेठेत मोठी मागणी आहे. या वायरलेस चार्जवर मोबाइल कोणत्याही वायरविना ठेवल्यानंतर अर्धा ते पाऊण तासात मोबाइल शंभर टक्के चार्ज होतो. हा चार्जर वीजपुरवठा होणाऱ्या सॉकेटशी कनेक्ट असणे गरजेचे आहे. यामध्ये वर्तुळाकार, आयताकृती वायरलेस चार्जर उपलब्ध आहेत.

किंमत-१२०० ते ३ हजार रुपये

वायरलेस स्पीकर

सहलीसाठी मित्रमैत्रिणींसोबत-कुटुंबासोबत बाहेर गेल्यावर किंवा एखाद्या ठिकाणी नाइट कॅम्पसाठी बाहेर गेल्यावर तसेच पाटर्य़ादरम्यान मौजमजा म्हणून नाचगाण्यासाठी स्पीकर महत्त्वाचे ठरतात. मात्र भल्या-मोठय़ा आकाराचे स्पीकर घेऊन जाणे हे त्रासदायक ठरते. तसेच जंगल किंवा समुद्रकिनारी स्पीकर लावायचा असल्यास त्या ठिकाणी वीजपुरवठा करण्यासाठी कोणत्याही प्रकारची सुविधा उपलब्ध होत नाही. अशा वेळेस वायरलेस स्पीकर कामी येतात. वायरलेस स्पीकर मोबाइल किंवा लॅपटॉपला ब्ल्यूटूथच्या आधारे संलग्नित करून स्पीकरवर गाणी वाजवता येतात. लॉजिटेक, सॉऊंडबोट, आयबॉल, इंटेक्स, फोट्रॉनसारखे विविध वायरलेस स्पीकर बाजारात उपलब्ध आहेत. इंटरनेट असिस्टंटद्वारेही काही वायरलेस स्पीकरवर इंटरनेटच्या माध्यमातून हवे ते गाणे सुरू करता येते. काही वायरलेस स्पीकरमधून आकर्षक प्रकाशही बाहेर पडतो.

किंमत- १ हजार ते ३ हजार रुपये.

वायरलेस हेडफोन्स-ईअरफोन्स

प्रवासादरम्यान किंवा अन्य ठिकाणी गाणी ऐकण्याची किंवा चित्रपट पाहण्याची अनेकांना आवड असते. मात्र गाणी ऐकताना किंवा चित्रपट पाहताना मोबाइलमधून येणाऱ्या आवाजाचा आजूबाजूच्या व्यक्तींना त्रास होऊ नये याकरिता हेडफोन्स आणि ईअरफोन्स महत्त्वाचे ठरतात. मात्र ज्या वेळी आपल्याला हेडफोन्स किंवा ईअरफोन्स वापरायचे असतात त्या वेळेसच नेमका त्यांच्या वायरींचा गुंता झालेला असतो. हा गुंता सोडवणे अनेकदा कठीण जाते. काही वेळा हेडफोन्स-ईअरफोन्स तुटण्याचीही दाट शक्यता असते. त्यांच्या वायरीसह ते हाताळणे कंटाळवाणे ठरते. परिणामी या वायरींना पर्याय म्हणून उपलब्ध असतात ते वायरलेस हेडफोन्स-ईअरफोन्स. सध्या वायरलेस हेडफोन्स-ईअरफोन्सला ग्राहकांकडून मोठी मागणी आहे. चार्जिगवर चालणाऱ्या या हेडफोन्स-ईअरफोन्सला वायर नसल्याने संगणकावर काम करताना तसेच इतर महत्त्वाची कामे करताना ब्ल्यूटूथच्या आधारे फोनवर समोरील व्यक्तीशी अडथळ्याविना संवाद साधता येतो. एखाद्या व्यक्तीला फोन लावायचा असेल तर मोबाइल खिशातून बाहेर न काढता मोबाइल आणि वायरलेस हेडफोन्स-ईअरफोन्स एकमेकांशी संलग्न असल्यावर गुगल असिस्टंट किंवा सीरीद्वारे आपल्याला हव्या त्या व्यक्तीला फोन लावता येतो. सध्या वायरलेस नेकबॅण्ड ईअरफोन्सला ग्राहकांकडून मोठी मागणी आहे. गळ्यात अडकवण्यात येणारे हे वायरलेस ईअरफोन्स बॅण्ड थोडे आकर्षक असून आवाजाचा उत्कृष्ट दर्जा देतात. स्कलकॅण्डी, बोट, सोनी, लेव्हल, बोस, जेबीएलसारखे वायरलेस हेडफोन्स-ईअरफोन्स सध्या बाजारात सुप्रसिद्ध आहेत.

किंमत-८०० ते ५ हजार रुपये.

वायरलेस कीबोर्ड आणि माऊस

लॅपटॉपवर दीर्घकाळ काम करताना लॅपटॉपवरील अरुंद कीबोर्डमुळे टंकलेखन करणे जिकरीचे होते. अनेकदा चुकाही होण्याच्या शक्यता असतात, लॅपटॉपवरील माऊस सेन्सर हाताळताना अनेकदा अडथळा येतो. योग्य ठिकाणी डेस्कटॉपवर क्लिक होत नाही. अशा वेळेस वायरलेस कीबोर्ड आणि माऊस कामी येते. बाजारात डेल, लॉजिटेक, रापो, एचपी, आयबॉल, लेनव्हो यांसारख्या विविध ब्रॅण्ड्सच्या वायरलेस कीबोर्ड आणि माऊसला मोठी मागणी आहे.

किंमत-१ हजार ते ३ हजार

संकलन- ऋषिकेश मुळे

@rushikeshmule24