Kitchen Hacks: भारतात भात हा खूप आवडीने खाल्ला जाणारा पदार्थ आहे. अनेकांना ताटात पोळी-भाजी नसली तरीही चालेल, पण भात हा हवाच असतो. शिवाय भात खाल्ल्याशिवाय काहींचे पोटही भरत नाही. असा हा खूप महत्त्वाचा पदार्थ प्रत्येक घरात दिवसातून एकदा तरी बनवला जातो. अनेक जण महिन्याचा किराणा भरताना एक महिन्यासाठी लागणारे तांदूळ विकत घेतात. पण, काही जण वर्षाचा किंवा सहा महिन्यांसाठी लागणारे धान्य एकादाच भरतात, त्यामुळे भातामध्ये मुंग्या होतात. अशा परिस्थितीत तांदळातून मुंग्या काढण्यासाठी खूप मेहनत घ्यावी लागते आणि वेळही वाया जातो. या समस्या दूर करण्यासाठी आज आम्ही तुमच्यासाठी काही महत्त्वाच्या टिप्स घेऊन आलो आहोत.
तांदळाच्या डब्यातील मुंग्या पळवून लावा
लसूण
तांदळात होणाऱ्या मुंग्यांना दूर करण्यासाठी तुम्ही तांदळाच्या डब्यात न सोललेल्या ७-८ लसूण पाकळ्या टाकून ठेवा आणि तांदळात व्यवस्थित मिक्स करून घ्या. जेव्हा लसणीच्या पाकळ्या पूर्ण सुकतील तेव्हा त्या बाहेर काढा आणि दुसऱ्या घाला, यामुळे तांदळात मुंग्या होणार नाहीत.
कडुलिंबाची पाने आणि मिरची
तांदळाच्या हवाबंद डब्यात फक्त मूठभर कडुलिंबाची पाने किंवा पाच-सहा कोरड्या लाल मिरच्या घाला. यामुळेदेखील तांदळाला कीड, आळ्या किंवा मुंग्या लागत नाहीत.
लवंग आणि दालचिनी
तांदळातील मुंग्या दूर करण्यासाठी तुम्ही लवंग आणि दालचिनीचाही वापर करू शकता. यासाठी मूठभर लवंग, दालचिनी घ्या आणि ती डब्यात ठेवा. या दोन्हींच्या वासामुळे मुंग्या लागणार नाहीत.
माचीसची काडी
जर तुम्हाला तांदळाचे मुंग्या, आळ्यांपासून संरक्षण करायचे असेल तर तुम्ही ज्या डब्यात तांदूळ ठेवता, त्या डब्यात माचीसच्या काड्या ठेवा. माचीसची काडी कीटकांना दूर ठेवण्यास मदत करते.
हेही वाचा: तुमच्या मानेच्या चरबीमुळे श्वासोच्छ्वास घेण्यात अडथळे येऊ शकतात? तज्ज्ञ काय सांगतात…
तमालपत्र
तांदळाच्या डब्यातील मुंग्या दूर करण्यासाठी तुम्ही लाल मिरचीच्या जागी तमालपत्रही वापरू शकता. तमालपत्र कीटकांपासून संरक्षण करण्यासाठी खूप फायदेशीर आहे.
