वैज्ञानिकांनी इबोलाचे तीन नैसर्गिक प्रतिपिंड शोधून काढले असून त्यांचा वापर करून या रोगावर सर्वांसाठी वापरता येईल अशी लस तयार करणे शक्य आहे. इबोला विषाणूच्या अनेक प्रजाती असून त्यात ही प्रतिपिंडे उपयोगी आहेत. इबोलामुळे मानवी मृत्यूंचे प्रमाण मोठे असून त्यावर लस तयार करणे आवश्यक आहे. त्यात हे एक पाऊल पुढे पडले आहे असे नेचर मायक्रोबायॉलॉजी या नियतकालिकात म्हटले आहे. इबोला विषाणूची लागण झाल्यानंतर दोन दिवस ते तीन आठवडे या काळात ताप, घशाला सूज, स्नायू दुखणे, डोकेदुखी ही लक्षणे दिसतात. इबोला संसर्गावर आतापर्यंत बरेच संशोधन झाले असून त्यात झेडमॅपचा समावेश आहे. ते माकडांमध्ये उपयोगी सिद्ध झाले आहे. ही लस आतापर्यंतच्या इबोला साथींमध्ये उपयोगी होती ती पुढे प्रभावी ठरेलच असे नाही. इबोला बुंडिबुग्यो, रेस्टन किंवा सुदान प्रकारच्या विषाणूंमध्ये त्याचा प्रभाव पडत नाही असे टेक्सा विद्यापीठातील अ‍ॅलेक्स बुक्रेयेवयांनी सांगितले. तीन प्रकारच्या नैसर्गिक प्रतिपिंडांचा अभ्यास यात करण्यात आला असून त्यांच्या मदतीने या वेगवेगळ्या इबोला विषाणूंवर मात करता येते. नवीन प्रतिपिंड हे इबोला विषाणूच्या वेगवेगळ्या भागात जाऊन चिकटतात त्यामुळे यातून इबोलावर नवी लस तयार करणे शक्य आहे. इबोलाचा शोध पहिल्यांदा १९७६ मध्ये इबोला नदीच्या परिसरात लागला होता तो भाग आता काँगो प्रजासत्ताक म्हणून ओळखला जातो.
