Make This Healthy Juice Easily At Home : डाळिंब हे फळ अँटिऑक्सिडंट्सच्या बाबतीत स्ट्रॉबेरी, ब्लूबेरी व रास्पबेरीशीसुद्धा स्पर्धा करू शकते. व्हिटॅमिन ए, लोह याव्यतिरिक्त डाळिंबात इतर अनेक जीवनसत्त्वे आणि खनिजे असतात. मार्केटमध्ये डाळिंब वर्षभर उपलब्ध असले तरी हिवाळ्यात ते स्वस्त दरात मिळते. जर तुम्हाला निरोगी राहायचे असेल, तर तुम्ही दररोज एक डाळिंब म्हणजेच डाळिंबाच्या बिया किंवा रस पिणे आवश्यक आहे. कारण- तुमच्या शरीर आणि चेहऱ्यासाठी ते फायदेशीर आहे (Glowing Skin Tip) . आता घरच्या घरी डाळिंबाचा रस कसा बनवायचा ते जाणून घेऊ.
कधी कधी आपण मार्केटमधून दोन ते तीन किलो डाळिंब आणतो; पण ते सोलण्यात खूप अडचण येते. याचबरोबर डाळिंब खाण्यातही अनेकांना त्रास होतो. वृद्ध दातांच्या समस्येमुळे डाळिंब खाऊ शकत नाही आणि मुलांना ते चघळणे अजिबात आवडत नाही. घरातील काही सदस्य लवकर कामावर जात असल्याने त्यांनाही डाळिंब सोलून खाण्यास पुरेसा वेळ मिळत नाही. तर यावर उपाय म्हणजे डाळिंबाचा रस. डाळिंबाचा रस या सर्व समस्यांवर मात करू शकतो (Glowing Skin Tip). बाजारात भेसळयुक्त, घाणेरडा किंवा संसर्गजन्य ज्यूस विकत घेण्यापेक्षा डाळिंबाचा ज्यूस घरी बनवणे खूप चांगले आणि सोपेसुद्धा आहे. त्यासाठी तुम्हाला फक्त मिक्सर आणि पांढरे कापड हवे आहे.
घरच्या घरी डाळिंबाचा रस कसा बनवायचा ते चला जाणून घेऊ…
- डाळिंबाचा रस तयार करण्यासाठी प्रथम डाळिंब सोलून घ्या. ते मिक्सरमध्ये टाका आणि मिक्सर सेटिंगनुसार सर्वांत जास्त वेगाने मधे-मधे ब्रेक घेत पाच मिनिटे चालवा.
- त्यानंतर डाळिंबाची प्युरी तयार होईल. त्यात अर्धी किंवा एक वाटी (डाळिंबाच्या प्रमाणानुसार) पाणी घाला. जर मोठे डाळिंब असेल, तर अर्धा कप पाणी पुरेसे आहे. दोन डाळिंबांसाठी एक कप पाणी पुरेसे आहे.
- नंतर मिक्सर सुमारे एक मिनीट चालवा आणि एका वाडग्यावर किंवा रुंद तोंडाच्या भांड्यावर कापड ठेवा, त्यात बारीक करून घेतलेले मिश्रण टाका आणि ते चांगले दाबून गाळून घ्या.
- कोणतीही भेसळ नसलेला ताजा आणि आरोग्यदायी डाळिंबाचा रस तुमच्यासाठी तयार आहे.
- अशा प्रकारे ज्युसरशिवाय केवळ पाच मिनिटांत हेल्दी ज्यूस तयार होतो. जर तुम्हाला हवे असेल, तर तुम्ही त्यात गाजर आणि बीटरूटदेखील मिक्स करू शकता.
डाळिंबाचा रस या आजारांपासून करतो बचाव
डाळिंब हा १०० आजारांवर एक उपाय आहे, असे म्हटले जाते. या फळाचे इतके फायदे आहेत की, ते प्रत्येक आजारावर औषध म्हणूनदेखील खाल्ले जाते. त्यात कर्करोगविरोधी आणि दाहकविरोधी गुणधर्म आहेत. ज्यांना हिमोग्लोबिन किंवा लोहाची कमतरता आहे, त्यांच्यासाठी डाळिंब हा उत्तम उपाय आहे. हे आतड्याचे आरोग्य, अपचन आणि बद्धकोष्ठतादेखील सुधारते. डाळिंबाचा रस नियमित प्यायल्याने शरीर निरोगी तर होतेच; शिवाय चेहऱ्यावरील चमकही वाढवते (Glowing Skin Tip). आता उशीर न करता घरीच डाळिंबाचा रस बनवा आणि रोज प्या.
