नवी दिल्ली : मेंदूशी संबंधित स्मृतिभ्रंश हा आजार असून स्मरणशक्ती गमावण्याबरोबर या आजाराच्या रुग्णांना अनेक शारीरिक समस्यांचा सामना करावा लागतो. त्यामुळे या आजारावर ठोस उपचार शोधण्यासाठी संशोधक अथक प्रयत्न करत आहेत. त्यांना काही प्रमाणात यश आले आहे. विशेष म्हणजे या आजारावर एक लसही विकसित करण्यात येत आहे. बोस्टनमधील ‘अमेरिकन हार्ट असोसिएशन’च्या संशोधकांनी स्मृतिभ्रंशावर एक लस विकसित करण्यासाठी प्रयत्न केला आहे. त्यासाठी संशोधकांनी उंदरांवर प्रयोग केले असून ते यशस्वी झाल्याचा दावा करण्यात येत आहे. टोक्योमधील ‘ज्युटेंडो युनिव्हर्सिटी ग्रॅज्युएट स्कूल ऑफ मेडिसिनने’ही या विकारावर मात करण्यासाठी संशोधन केले आहे. यासाठी वृद्ध उंदरांमध्ये आढळणाऱ्या आजाराचा अभ्यास करण्यात आला. या वेळी विशेषत: उंदरांच्या स्मृतिभ्रंशावर लस विकसित करण्यावर लक्ष केंद्रित करण्यात आले होते. या वेळी ‘सेनेसीन असोसिएट ग्लायकोप्रोटीन’ हे विकसित करण्यात आले. या लशीमुळे अ‍ॅथेरोस्क्लेरोसिन आणि टाइप दोन प्रकारच्या मधुमेहासह अनेक आजारांवर चांगले परिणाम झाल्याचे दिसून आले. संशोधकांच्या म्हणण्यानुसार ही लस स्मृतिभ्रंशाच्या रुग्णांसाठी दिलासादायक ठरण्याची अधिक शक्यता आहे.
