१०० ग्रॅम चवळीच्या भाजीत दडलंय काय? वजन, कोलेस्ट्रॉल कमी करताना कशी होते मदत, खाल्ल्यावर एवढं करा की..

एकता सिंघवाल, आहारतज्ज्ञ, उजाला सिग्नस ग्रुप ऑफ हॉस्पिटल्स यांनी इंडियन एक्सस्प्रेसशी बोलताना, चवळीच्या जीवनसत्त्वे, खनिजे आणि फायबरच्या साठ्याविषयी माहिती देत १०० ग्रॅम चवळीचे आरोग्याला मिळणारे संभाव्य फायदे नमूद केले आहेत.

१०० ग्रॅम चवळीच्या भाजीत दडलंय काय?

• कॅलरी: १२०
• कार्ब्स : २१.४५ ग्रॅम
• फायबर: ६.७ ग्रॅम
• साखर: ४.४ ग्रॅम
• प्रथिने: ८.३ ग्रॅम
• चरबी: ०.९ ग्रॅम
• व्हिटॅमिन सी, व्हिटॅमिन ए, व्हिटॅमिन के, व्हिटॅमिन बी-कॉम्प्लेक्स (B1, B2, B3 आणि B5 सह)
• कॅल्शियम, फॉस्फरस, लोह, पोटॅशियम, मॅग्नेशियम, तांबे, मँगनीज
• अँटिऑक्सिडंट्स: चवळीमध्ये पॉलिफेनॉल, फ्लेव्होनॉइड्स आणि टॅनिनसह विविध अँटिऑक्सिडंट्स असतात, जे ऑक्सिडेटिव्ह नुकसानापासून पेशींचे संरक्षण करण्यास मदत करतात.

चवळीचे आरोग्याला काय फायदे आहेत? (Benefits Of Chavali)

• हृदयाचे आरोग्य: चवळीमध्ये फायबरचा मोठा साठा असतो ज्यामुळे कोलेस्टेरॉलची पातळी कमी करण्यास आणि हृदयविकाराचा धोका कमी करण्यास मदत होऊ शकते. याव्यतिरिक्त, त्यातील पोटॅशियम रक्तदाब नियंत्रित करण्यास मदत करते.
• पाचक आरोग्य: चवळीमधील फायबर निरोगी पचनास प्रोत्साहन देते, बद्धकोष्ठता कमी करून आतड्यांचे आरोग्य सुधारण्यास मदत करते.
• वजन नियंत्रण : चवळीत चरबी आणि कॅलरी कमी असतात परंतु प्रथिने आणि फायबर जास्त असतात, ज्यामुळे चवळी खाल्ल्यावर बराच वेळ पोट भरल्याची जाणीव राहते, यामुळे वारंवार विनाकारण खाणे कमी होऊन वजन नियंत्रणाच्या प्रवासात मदत होऊ शकते.
• रक्तातील साखरेचे नियंत्रण: चवळीमध्ये असणारे विरघळणारे फायबर साखरेचे शोषण कमी करते, रक्तातील साखरेची पातळी स्थिर ठेवण्यास आणि अचानक होणारी वाढ टाळण्यास मदत करते, ज्यामुळे मधुमेह असलेल्या लोकांसाठी चवळी फायदेशीर ठरते.
• हाडांचे आरोग्य: चवळीमध्ये कॅल्शियम, फॉस्फरस आणि मॅग्नेशियम सारखी खनिजे असतात, जी मजबूत आणि निरोगी हाडे राखण्यासाठी फायदेशीर ठरू शकतात.

मधुमेह असल्यास चवळी खावी का? (Can Diabetes Patient Eat Chavali)

सिंघवाल सांगतात की, मधुमेह असलेल्या व्यक्ती संतुलित आहाराचा भाग म्हणून चवळीचे सेवन करू शकतात. यामध्ये कमी ग्लायसेमिक इंडेक्स आणि उच्च फायबर असल्याने रक्तातील साखरेची पातळी नियंत्रणात राहण्यास मदत होऊ शकते.

गर्भवती महिलांसाठी चवळी सुरक्षित आहे का? (Can Pregnant Women Eat Chavali)

प्रथिने, फायबर, जीवनसत्त्वे आणि खनिजांसह उच्च पौष्टिक मूल्यांमुळे गर्भवती महिलांसाठी चवळी फायदेशीर ठरू शकते. पण, गर्भवती महिलांनी आजारांचा धोका टाळण्यासाठी चवळी पूर्णपणे शिजवल्याशिवाय खाऊ नये.

चवळीची भाजी खाताना ‘या’ गोष्टींचे असुद्या भान!

१) तुम्हाला या भाजीची ऍलर्जी आहे का हे ओळखा. यासाठी भाजी खाल्ल्यावर सदृश्य व अदृश्य बदलांकडे बारकाईने लक्ष द्या. काहींना त्वचेवर प्रतिक्रिया दिसू शकतात किंवा काहींना ऍसिडिटी होऊ शकते, हे बदल नीट तपासा.

२)इतर सर्व पदार्थांप्रमाणेच पोर्शन कंट्रोलचा नियम चवळीला सुद्धा लागू होतो. प्रमाणात सेवन करा.

हे ही वाचा<<दिवसभरात बटाटा, पोळ्या, भात व साखरेच्या रूपातील कार्ब्स किती प्रमाणात खावं? प्रमाण वाढताच ‘हे’ त्रास वर काढतात डोकं

३)अनेकदा चवळीच्या गटातील भाज्यांमुळे ऑक्सलेट वाढून मुतखडा होण्याची भीती असते पण हे पूर्ण सत्य नाही. आपण संतुलित आहाराचा भाग म्हणून चवळी खाल्ल्यास आपल्याला त्रास होण्याची शक्यता कमी असते. तरीही गरज भासल्यास आपण आपल्या वैद्यकीय तज्ज्ञांशी चर्चा करून तुमच्या शरीराला साजेसा निर्णय घेऊ शकता.