बटाटे खाण्याबाबत अनेक समज गैरसमज आहेत. बटाटे खाल्ल्याने वजन वाढते किंवा हृदयाच्या संबंधित समस्या निर्माण होतात अशा अनेक चर्चा होताना दिसतात. मात्र तुम्हाला माहित आहे का, खरं तर बटाटे हृदयाच्या आरोग्यासाठी चांगले आहेत. आता तुम्हाला प्रश्न पडला असेल ते कसे? तर जाणून घेऊया. जर तुम्ही बटाटा तळून किंवा भाजी करून खाल्लात तर नक्कीच याने समस्या निर्माण होऊ शकतात. मात्र जर तुम्ही बटाटा उकडून किंवा बेक केलेले बटाटे मर्यादित प्रमाणात खाल्लात तर त्याचे अनेक फायदे आहेत.
हृदयाच्या चांगल्या आरोग्यसाठी बटाटा फायदेशीर कसा ते जाणून घ्या…
रक्तदाब कमी होतो
बटाट्यामध्ये पोटॅशियम मुबलक प्रमाणात असते, जे रक्तदाब कमी करण्यास मदत करते. बटाट्यामध्ये असलेले पोटॅशियम हे हृदयाच्या कार्यासाठी आवश्यक असलेल्या खनिजांपैकी एक आहे. हे हृदयाला शरीरातून रक्त पंप करण्यास मदत करते आणि हृदयाचे कार्य संतुलित ठेवते. बटाटे रक्तदाब नियंत्रणात ठेवण्यास मदत करतात आणि हृदय व रक्तवाहिन्यासंबंधी रोगांचा धोका कमी करतात.
( हे ही वाचा: Uric Acid: युरिक अॅसिडने बॉर्डर लाइन पार केलीय? तर आजच खायचे सोडा ‘हे’ ५ पदार्थ)
खराब कोलेस्टेरॉलची पातळी कमी करते
बटाट्यामध्ये द्रव्यशील फायबर देखील भरलेले असते, जे हृदयरोगाचा धोका कमी करण्यास मदत करते असे अनेक संशोधनातून दिसून आले आहे. बर्‍याच अभ्यासांनी हे सिद्ध केले आहे की द्रव्यशील फायबर असलेले पदार्थ खराब कोलेस्टेरॉल म्हणून ओळखल्या जाणार्‍या एलडीएलची पातळी कमी करण्यास मदत करतात. त्यामुळे हृदयाचे आरोग्य सुधारते.
हृदय आणि रक्तवाहिन्याशी संबधित समस्या सोडवते
बटाट्यामध्ये पोषक घटक देखील असतात ज्यामुळे रक्तदाब कमी होतो आणि हृदय व रक्तवाहिन्यासंबंधी आरोग्यास चालना मिळते, ज्यामध्ये मॅग्नेशियम, नियासिन, व्हिटॅमिन सी आणि व्हिटॅमिन बी ६ यांचा समावेश आहे. त्यामुळे जर तुम्ही बटाट्यांचा योग्यरित्या आणि मर्यादित प्रमाणात सेवन करत असाल, तर त्याचा आरोग्यसाठी चांगला फायदा होतो.
