अभिनेता मोहसिन खानला ३१ व्या वर्षी हृदयविकाराचा झटका! फॅटी लिव्हरसाठी ‘या’ वाईट सवयी ठरल्या कारणीभूत, वाचा डॉक्टरांचे मत

सात दिवसांच्या कामाचे वेळापत्रक, रात्रीची अपुरी झोप व नाईट शिफ्ट अशा सर्व त्रासामुळे त्याला नॉन अल्कोहोलिक फॅटी लिव्हर डिसीज (NAFLD) आजाराचे निदान झाले. हल्ली तरुणांमध्येही या आजाराचे प्रमाण मोठ्या प्रमाणात वाढतेय. त्यामागे अपुरी झोप, खाण्या-पिण्याच्या चुकीच्या सवयी, खराब आहार, व्यायामाचा अभाव, लठ्ठपणा अशा गोष्टी कारणीभूत ठरत आहेत.

Read More Health News : दिवसातून एकदाच जेवण अन् मध्यरात्री ३ वाजता व्यायाम; अभिनेता शाहरुख खानचा ‘हा’ फिटनेस फंडा खरंच फायदेशीर आहे का? वाचा तज्ज्ञांचे मत

NAFLD आजार नेमका होतो कशामुळे? (Fatty liver disease may increase heart failure risk)

दिल्लीच्या इंद्रप्रस्थ अपोलो हॉस्पिटल्समधील वरिष्ठ गॅस्ट्रोएन्टेरोलॉजिस्ट डॉ. सुदीप खन्ना यांनी इंडियन एक्स्प्रेसशी बोलताना याविषयी माहिती दिली की, दिवसेंदिवस बिघडत चाललेली जीवनशैली; ज्यामुळे नॉन अल्कोहोलिक फॅटी लिव्हर आजाराचा धोका वाढतोय. त्यासह प्रक्रिया केलेले अन्नपदार्थ, साखर असलेले पदार्थ, चरबीयुक्त आहार, बैठी जीवनशैली, व्यायामाचा अभाव या सर्व कारणांमुळे अनेक जण नॉन अल्कोहोलिक फॅटी लिव्हर आजाराचे बळी ठरत आहेत.

त्याशिवाय अपुरी झोप ही एक गंभीर समस्या आहे; जी आजच्या वेगवान जगात सामान्य बनत आहे. झोपेच्या अभावामुळे शरीराच्या चयापचय प्रक्रियेत व्यत्यय येतो. त्यामुळे शरीरात चरबीचे प्रमाण वाढते, इन्सुलिन प्रतिरोधक क्षमता वाढते. शरीरास पुरेशा झोपेची गरज असते. कारण- झोप पूर्ण न झाल्यास हार्मोन्स असंतुलित होतात आणि त्यामुळे यकृतामध्ये चरबी जमा होते. त्याशिवाय अपुरी झोप ही बाब भूक वाढवण्याशी आणि हाय कॅलरी पदार्थांच्या लालसेशी संबंधित आहे. त्यामुळे वजन वाढण्यास हातभार लागतो, असेही डॉ. सुदीप खन्ना म्हणाले.

२०२२ मध्ये जपानमध्ये प्राण्यांवर केलेल्या अभ्यासात असे दिसून आले आहे की, रात्री सात ते आठ तासांची झोपेची वेळ प्रत्येक एक तासाने कमी केल्यास पुरेशी झोप घेतलेल्या लोकांच्या तुलनेत यकृतामध्ये चरबी जमा होण्याचा धोका २४ टक्क्यांनी वाढतो.

NAFLD चा हृदयाच्या आरोग्यावर कसा परिणाम होतो?

यकृतामध्ये चरबी जमा झाल्यास हृदय आणि रक्तवाहिन्यांशी संबंधित घटकांवर परिणाम होतो. कारण- यकृत आणि हृदय हे एकमेकांशी जोडलेले आहेत. जेव्हा यकृत फॅटी असते, तेव्हा जळजळ होऊ शकते. त्यामुळे हृदयाच्या रक्तवाहिन्या जड होतात आणि रक्तप्रवाह प्रभावित होतो.

एनएएफएलडी असलेल्या रुग्णांमध्ये एथेरोस्क्लेरोसिसचा धोका वाढतो. अशा परिस्थितीत हृदयविकाराचा झटका येण्याचीही शक्यता असते. कोलेस्ट्रॉल वाढू शकते, असे दिल्लीतील फोर्टिस एस्कॉर्ट्स हार्ट इन्स्टिट्यूटचे इंटरव्हेंशनल कार्डिओलॉजी डॉ. निशिथ चंद्रा यांनी सांगितले.

आहारात काय खावे आणि काय खाऊ नये?

साखरयुक्त पदार्थ, तळलेले किंवा प्रक्रिया केलेले पॅकिंग पदार्थ, ट्रान्स फॅट्स असलेले स्नॅक्स खाणे टाळावे. कारण- या पदार्थांमुळे व्हिसेरल फॅट्स व यकृतात चरबी जमा होते आणि ज्यामुळे एनएएफएलडी आजाराचा धोका वाढतो.

अशा पदार्थांऐवजी तुम्ही तृणधान्य, प्रोटीनयुक्त पदार्थ व फॅट नसलेले पदार्थ खा; जसे की, मासे, शेंगदाणे, पालेभाज्या भाज्या.